१.
समयको वहावसँग बहन नसक्नुनै नियतिको खेल रहेछ
हृदयको धड्कावसँग रहन नसक्नुनै पिरतिको झेल रहेछ
मस्तिष्कका तन्तुसँगका चेतना संवेदना छचल्किन्छन् जताततै
नयनको स्वभावसँग सहन नसक्नुनै संगतिको मेल रहेछ!
२.
नहाँसेरै हाँस्नुमा,नबाँचेरै बाँच्नुमा पीडा धेरै हुन्छ
नसाँचेरै साँच्नुमा,नभाँचेरै भाँच्नुमा पीडा धेरै हुन्छ
सत्य र असत्यको भ्रमित संयोजनमा लट्टाउँछन् आँखा
नराखेरै राख्नुमा, नजाँचेरै जाँच्नुमा पीडा धेरै हुन्छ !!
३.
रात र दिनको बीचमा कुन बिहान हुन्छ?
मृत्यु-जीवनको बीचमा कुन चिहान हुन्छ ?
तत्व र सत्यको संसार जाली चक्रव्युहमा
पाउ र माथको बीचमा कुन सिह्रान हुन्छ ?
४.
ओखतीले छुँदैछुन्न मुटु दुखेपछि
आत्मा निको हुँदैहुन्न मुटु दुखेपछि
यादले गाँजेर सताउँछ,घरिघरि दुख्छ
नयन सुख्खा हुँदैहुन्न मुटु दुखेपछि
५.
कालापानीको निहुँमा नालापानी दोहोरिन सक्छ
यी गोर्खालीको रगतमा हानाहानी नरोकिन सक्छ
स्वाभिमानीको आत्मामा जानाजानी ठेस नपुर्याउनु
घातीवैरीको गर्धनमा हावापानी नसोचिन सक्छ !!!!!
प्रकाश कोइराला
गोलन्जोर-६, सिन्धुली
२०७६/०७/२२, शुक्रबार
(प्रकाश काेइरालाकाे फेसबुकबाट साभार)
