काठमाडौँ। नेपाल विद्युत् प्राधिकरणको कायम निमित्त कार्यकारी निर्देशक दीर्घायुकुमार श्रेष्ठलाई कायममुकायम कार्यकारी निर्देशकको जिम्मेवारी दिइएको छ ।
ऊर्जा, जलस्रोत तथा सिँचाइमन्त्री विराजभक्त श्रेष्ठले आज मन्त्रिस्तरीय निर्णयमार्फत श्रेष्ठलाई सो पदमा नियुक्त गर्नुभएको हो ।
श्रेष्ठ २९ वर्षदेखि प्राधिकरणको प्राविधिक तथा व्यवस्थापकीय जिम्मेवारीमा सक्रिय रहँदै आउनुभएको छ । उहाँ २०५४ सालमा सातौँ तहको अधिकृतका रूपमा प्राधिकरणमा सेवा प्रवेश गर्नुभएको थियो ।
काठमाडौं महानगरपालिका–१२ निवासी श्रेष्ठले इलेक्ट्रिकल इन्जिनियरिङमा स्नातक तथा इन्फर्मेशन एण्ड कम्युनिकेसन इन्जिनियरिङमा स्नातकोत्तर तहको अध्ययन पूरा गर्नुभएको छ । प्राधिकरणले ऊर्जा क्षेत्रको व्यवस्थापन, प्रसारण प्रणाली विस्तार तथा विद्युत् सेवा सुधारलगायतका कामलाई निरन्तरता दिने अपेक्षासहित श्रेष्ठलाई कायममुकायम कार्यकारी निर्देशकको जिम्मेवारी दिएको हो ।
दुई सञ्चालक समिति सदस्य नियुक्त
यस्तै, मन्त्री श्रेष्ठले दुई जना नयाँ सञ्चालक समिति सदस्य नियुक्त गर्नुभएको छ । नवनियुक्त सदस्यमध्ये निजी क्षेत्रको प्रतिनिधित्व गर्दै काठमाडौँ महानगरपालिका–१५ का अंशुकीरण शाहीलाई सञ्चालक समितिमा समावेश गरिएको छ ।
त्यस्तै, उपभोक्ताकोतर्फबाट नार्गाजुन नगरपालिका–५ का कृष्ण बसेल नियुक्त हुनुभएको छ । प्राधिकरणको सञ्चालक समितिमा उपभोक्तातर्फ प्रतिनिधित्व दलित समुदायको सहभागिता सम्भवतः पहिलोपटक नियुक्त गरिएको हो ।
ऊर्जा, जलस्रोत तथा सिँचाइमन्त्री श्रेष्ठको अध्यक्षतामा आज बसेको प्राधिकरण सञ्चालक समितिको १०३०औँ बैठकले उक्त निर्णय गरेको हो । नवनियुक्त सञ्चालक समिति सदस्य तथा कामु कार्यकारी निर्देशकलाई आज नै ऊर्जामन्त्री श्रेष्ठले पद तथा गोपनियताको सपथ गराउनुभयो । रासस
