टेक्सास: नेपाल अमेरिका पत्रकार संघ (नेजा) ले आफ्नो स्थापना दिवस तथा १९औँ वार्षिकोत्सव विविध कार्यक्रमसहित सम्पन्न गरेको छ।
अप्रिल १८ र १९ मा टेक्सासको डलास शहरमा ‘नेजा कन्क्लेभ २०२६’, नेपालमा प्रवासी लगानीसम्बन्धी संवाद तथा रक्तदान कार्यक्रम आयोजना गर्दै वार्षिकोत्सव मनाइएको हो। नेजा उत्तर अमेरिकामा रहेका सक्रिय नेपाली पत्रकारहरूको साझा संस्था हो।
कन्क्लेभ २०२६ मा पत्रकारिताका वर्तमान चुनौतीहरू—सम्पर्क, सूचना र एकता—लाई मुख्य छलफलका विषयका रूपमा समेटिएको थियो।
पहिलो चरणको प्यानल छलफलमा स्थानीय पत्रिका “र्यामब्लर” का प्रकाशक जोन स्टार्कि, सञ्चार विज्ञ रोबर्ट वोलर, टेक्सासको ह्युस्टन क्षेत्रकी व्यावसायिक पत्रकारिता समाजकी संयोजक रुथ नसरुल्ला, ‘द टेक्सास ट्रिब्युन’ का सम्पादक निक गार्सिया तथा अस्टिन लिउटरले विविधता र समुदायसँग सम्बन्धित विषयमा सञ्चार क्षेत्रको भूमिकाबारे आफ्ना धारणा व्यक्त गरेका थिए।
त्यसैगरी दोस्रो चरणको छलफलमा “विश्व सञ्चार जगतमा नेपालको उपस्थिति, प्रतिनिधित्व र विश्वव्यापी दृष्टिकोणमा नेपाली सञ्चार क्षेत्र” विषयमा प्रकाश आचार्य, यशोदा तिम्सिना, प्रमोद आचार्य, टंक ढकाल र राजन कुइँकेलले आफ्ना विचार प्रस्तुत गरेका थिए।
तेस्रो चरणको प्यानल छलफलमा प्रोफेसर इन्द्रजीत सुलेजा र मुजिब काजीले सामुदायिक सञ्चार व्यवस्थापन विषयमा धारणा राखेका थिए।
वार्षिकोत्सवको दोस्रो दिन नेपालमा प्रवासी लगानीसम्बन्धी छलफल कार्यक्रम आयोजना गरिएको थियो, जसमा नेपाली व्यवसायी र सञ्चारकर्मीहरूको संयुक्त सहभागिता रहेको थियो। उक्त कार्यक्रमलाई नेपाली राजदूतावासले सहजीकरण गरेको थियो। कार्यक्रममा अमेरिकामा रहेका व्यवसायीहरूलाई नेपालमा लगानी गर्न प्रोत्साहित गर्दै वर्तमान अवस्थाबारे जानकारी दिइएको थियो भने लगानी वातावरण सुधारका लागि आवश्यक सुझावहरू संकलन गरिएको थियो।
यस अवसरमा व्यवसायीहरूले नेपालमा विदेशी लगानी आकर्षित गर्न विदेशी नागरिकता लिएका नेपालीहरूलाई सम्पत्तिको अधिकार सुनिश्चित गर्न माग गरेका थिए।
सरकारका तर्फबाट समस्या समाधानका लागि पहल गर्ने प्रतिबद्धता जनाउँदै कन्सुलेट जनरल सुरेश अधिकारी र कार्यवाहक राजदूत शरदराज आरणले नेपाली व्यवसायीहरूलाई सक्दो सहयोग गर्ने तथा अनुकूल वातावरण निर्माण गर्न सरकारलाई पहल गर्न आग्रह गर्ने बताएका थिए।
कार्यक्रमको समापन गर्दै नेजाका अध्यक्ष सुरज भण्डारीले संस्थाको वार्षिकोत्सव मनाउने परम्परागत शैलीलाई परिवर्तन गरी नयाँ ढंगबाट अघि बढाइएको उल्लेख गर्दै आगामी दिनमा यस्ता कार्यक्रमलाई अझ प्रभावकारी र सशक्त बनाउँदै लैजाने प्रतिबद्धता व्यक्त गरे।
