काठमाडौं । नेपालमै विकसित ट्राभल बुकिङ प्लेटफर्म घुम नेपाल (ghumNepal) सार्वजनिक गरिएको छ। स्थानीय पर्यटन प्रवर्द्धन, नेपाली आतिथ्यताको विस्तार तथा समुदायलाई सशक्त बनाउने उद्देश्यसहित प्लेटफर्म सञ्चालनमा ल्याइएको कम्पनीले जनाएको छ।

कम्पनीका अनुसार घुम नेपालमार्फत यात्रुहरूले देशभरका होमस्टे, अपार्टमेन्ट, सम्पूर्ण घर, होटल तथा विभिन्न स्थानीय अनुभव सहज रूपमा बुक गर्न सक्नेछन्।

प्लेटफर्ममा प्रमाणित होस्ट तथा अतिथि, सुरक्षित बुकिङ प्रणाली, स्वदेशी तथा अन्तर्राष्ट्रिय भुक्तानी सुविधा, रियल–टाइम क्यालेन्डर समन्वयलगायत सुविधा समावेश गरिएको जनाइएको छ। यसले आवास व्यवसायीलाई दोहोरो बुकिङको समस्या न्यूनीकरण गर्न तथा व्यवस्थापन सहज बनाउन सहयोग गर्ने कम्पनीको दाबी छ।

घुम नेपाल नेपाली सफ्टवेयर इन्जिनियरहरूले विकास गरेको प्लेटफर्म हो। कम्पनीका अनुसार यो AWS cloud ecosystem मा आधारित रहेकाले उच्च सुरक्षा, स्थिरता तथा निरन्तर सेवा सुनिश्चित गरिएको छ। प्रयोगकर्ता डाटाको सुरक्षाका लागि इन्क्रिप्सनसहित सुरक्षित डिजिटल प्रणाली अपनाइएको बताइएको छ।

कम्पनीका मुख्य साझेदारहरू नेपाल, अमेरिका र बेलायतमा आधारित नेपाली प्रविधि व्यवसायीहरू रहेको तथा उनीहरूको संयुक्त अनुभव ५० वर्षभन्दा बढी रहेको जानकारी दिइएको छ।

यस प्लेटफर्मको नेतृत्व प्रबन्ध निर्देशक रजेन काजी श्रेष्ठले गरिरहेका छन्। कम्पनीका अनुसार उनीसँग प्रविधि तथा विज्ञापन क्षेत्रमा १४ वर्षभन्दा बढी अनुभव रहेको छ।

लन्च अफरअन्तर्गत नयाँ प्रयोगकर्ताले पहिलो बसाइमा NPR 1000 छुट प्राप्त गर्न सक्नेछन्। छुटका लागि FIRSTSTAY कुपन कोड प्रयोग गर्न सकिने कम्पनीले जनाएको छ।

कम्पनीले घुम नेपाललाई केवल बुकिङ प्लेटफर्मका रूपमा नभई स्थानीय समुदाय, आन्तरिक पर्यटन र नेपाली प्रविधि प्रतिभालाई प्रवर्द्धन गर्ने अभियानका रूपमा अघि बढाउने लक्ष्य राखेको जनाएको छ।