काठमाडौं । नेपाली कांग्रेसले पछिल्लो प्रकरणबाट सरकार उत्तेजनामा आएको बताउँदै सरकारको यने निर्णयले देश पुन: अशान्तिमा फस्न सक्ने बताएको छ ।
सरकार संयमित नभए देश पुन: द्वन्द्व र अस्थिरतातर्फ जानसक्ने चिन्ता सो पार्टीले व्यक्त गरेको हो । पूर्व प्रधानमन्त्री केपी शर्मा ओली र पूर्व गृहमन्त्री रमेश लेखक पक्राउपछि शनिबार बसेको कांग्रेस बैठकपछि प्रवक्ता देवराज चालिसेले पाँच बुँदे धारणा सार्वजनिक गर्दै सो धारणा राखेका हुन् ।
‘भदौ २३ र २४ का घटनाका सम्बन्धमा सम्बन्धित व्यक्ति तथा संस्थाहरूको निष्पक्ष, पारदर्शी र विधिसम्मत ढंगले अनुसन्धान, अभियोजन लगायत सम्पूर्ण कानुनी प्रक्रिया अगाडि बढाइनुपर्छ भन्नेमा नेपाली कांग्रेस स्पष्ट छ,’ वक्तव्यमा भनिएको, ‘हामी प्रष्ट गर्न चाहान्छौँ– भदौ २३ गतेको घटनामा संलग्न सँगै २४ गतेको आगजनी र विध्वंशमा संलग्न को थिए भन्ने पनि जनताले थाहा पाउनुपर्छ ।’
सो वक्तव्यमा कांग्रेसले ओली र देउवाको नाम लिएको छैन । बरु भदौ २३ को घटनामा संलग्नसँगै २४ को विध्वंसका दोषीलाई पनि कारबाही गर्नुपर्ने धारणा राखेको हो । गौरीबहादुर कार्की आयोगको प्रतिवेदन अपूरो रहेको पनि सो धारणामा उल्लेख छ ।
