इङलिस प्रिमियर लिग अन्तर्गत शनिबार राति भएका खेलमा आर्सनलले एभर्टनलाई २—० गोल अन्तरले पराजित गरेसँगै यस सिजनको लिग उपाधि जित्ने सम्भावना बढेको छ ।
खासगरी गएराति नै भएको खेलमा आर्सनललाई पछ्याइरहेको म्यान्चेस्टर सिटी वेस्ट ह्यामसँग बराबरीमा रोकिए पछि आर्सनलको सम्भावना बढेको छ ।
पछिल्लो अंक तालिकामा अब आर्सनल र सिटीको अंक दूरी ९ पुगेको छ । यद्यपी म्यान्चेस्टर सिटीले आर्सनलभन्दा एक खेल कम खेलेको छ ।
आर्सनलले ३१ खेलबाट ७० अंक बनाएको छ भने सिटीले ३० खेलबाट ३० खेलबाट ६१ अंक जोडेको छ । अब आर्सनलले लिगमा सात खेल खेल्न बाँकी छ ।
गएरातिको खेलमा आर्सनलमाथि एभर्टनले निकै प्रभावशाली खेल प्रदर्शन गरेको थियो, र एकपछि अर्को सटिक आक्रमण गरेको थियो । तर भाग्यशाली आर्सनलका लागि गोलकिपर र डिफेन्डरले सुन्दर बचाउ गरेका थिए ।
एक समय यो खेल बराबरीमा टुंगिने स्थिति देखिएको थियो । तर दोस्रो हाफको ८९औं मिनेटमा खेलमा नाटकीय मोड आएको थियो । ८९औं मिनेटमा फर्वार्ड भिक्टर ग्योकोरेसले आर्सनलका लागि पहिलो गोल गरे ।
आर्सनलका लागि ९७औं मिनेटमा काउन्टर अट्याकमा म्याक्स डाउम्यानले गोल गरेर टिमको जित सुनिश्चित गरे ।
उता, अर्को खेलमा म्यान्चेस्टर सिटी यस सिजनमा रेलिगेसनको क्षेत्रबाट बाहिर निस्कन संघर्षरत वेस्ट ह्यामसँग स्तब्ध भयो । दुबै टिमबाट १—१ गोल भएको यस खेलमा सिटीले निकै आकर्षक र आक्रामक रणनीति बनाए पनि थप गोल गर्न सकेन ।
यद्यपी पहिलो गोल भने सिटीका लागि ३१औं मिनेटमा बर्नार्डो सिल्भाले अविश्वसनीय तरिकाबाट आकर्षक तरिकाले गरेका थिए । उनले डिबक्सभित्र क्रसपोस्टमा हानेको बल गोलकिपर र डिफेन्डरलाई छक्याएर गोलपोस्टको जाली चुमेको थियो ।
तर सिटीको अग्रता धेरै टिकेन । वेस्टह्यामका लागि कोन्स्टान्टिनोस माभरोपानोसले ३५औं मिनेटमा गोल गरेर खेललाई बराबरीमा ल्याए । त्यसपछि दुबै टिमबाट गोल हुन सकेन र खेल बराबरीमा टुंगियो ।
शनिबार रातिका खेल नतिजा
न्यूक्यासल vs चेल्सी (१—०)
ब्राइटन vs सन्डरल्यान्ड (१—०)
आर्सनल vs एभर्टन (२—०)
म्यान्चेस्टर सिटी vs वेस्ट ह्याम (१—१)
बर्नली vs बर्नमाउथ (०—०)
