स्पेन : लामिन यामालले करिअरकै पहिलो ह्याट्रिक गर्दै बार्सिलोनाले ला लिगामा भिल्लारियललाई ४–१ ले पराजित गरेको छ।
शनिबार भएको खेलपछि बार्सिलोनाले शीर्ष स्थानमा चार अंकको अग्रता बनाएको छ। बार्सिलोनाको ६४ अंक छ भने दोस्रो स्थानमा रहेको रियल म्याड्रिडको ६० अंक छ। तेस्रो स्थानमा रहेको भिल्लारियल ५१ अंकसहित पछाडि छ।
खेलको २८औँ मिनेटमा फर्मिन लोपेजले पापे गुएयेबाट बल खोसेर दिएको पासमा १८ वर्षीय यामालले सहज गोल गर्दै टोलीलाई अग्रता दिलाए। नवौँ मिनेटपछि उनले लामो बल नियन्त्रण गर्दै दायाँ विंगबाट एक्लै दौडेर डिफेन्डरहरूलाई छल्दै उत्कृष्ट प्रहारमार्फत दोस्रो गोल गरे।
४९औँ मिनेटमा गुएयेले भिल्लारियलका लागि एक गोल फर्काए पनि बराबरी गर्ने अवसर सदुपयोग गर्न सकेनन्। त्यसको फाइदा उठाउँदै ६९औँ मिनेटमा यामालले काउन्टर अट्याकमा अर्को गोल गर्दै ह्याट्रिक पूरा गरे।
अतिरिक्त समयमा वैकल्पिक खेलाडीका रूपमा मैदान प्रवेश गरेका बार्सिलोनाका फर्वार्ड रोबर्ट लेवान्डोव्स्कीले जुल्स काउन्डेको क्रसमा चौथो गोल थप्दै जित पक्का गरे।
खेलपछि यामालले टोलीको जित र व्यक्तिगत प्रदर्शनप्रति खुशी व्यक्त गरे। “भिल्लारियल राम्रो टोली हो। हामीले महत्वपूर्ण जित हासिल गरेका छौँ र आफ्ना गोलप्रति म निकै खुसी छु,” उनले भने। दोस्रो गोलबारे उनले थपे, “बल मेरो खुट्टामा हुँदा म नै निर्णय गर्छु। डिफेन्डर एकातिर गएका बेला म अर्कोतिर लागेँ।” एजेन्सी
