काठमाडौं । अखिल नेपाल फुटबल संघ (एन्फा) का पूर्वअध्यक्ष गणेश थापाले राष्ट्रिय महिला फुटबल टोलीकी कप्तान साबित्रा भण्डारी (साम्बा) को उपचारका विषयमा चिन्ता व्यक्त गर्दै व्यक्तिगत रूपमा आर्थिक सहयोग घोषणा गरेका छन्।
सामाजिक सञ्जालमार्फत उनले साम्बाको पछिल्लो अवस्थाले आफूलाई भावुक बनाएको उल्लेख गरेका छन्। एन्फाले उपचारको पहल नगरे पनि साम्बाको उपचार गराएर पुनः खेलमैदानमा फर्काउने प्रतिबद्धता व्यक्त गर्दै उनले तत्कालका लागि ५० हजार रुपैयाँ व्यक्तिगत सहयोग गर्ने घोषणा गरेका हुन्।
थापाका अनुसार करिब एक साताअघि साम्बाले एन्फाले उपचार गर्न नसक्ने जानकारी दिएपछि उनले व्यक्तिगत पहल सुरु गरेका थिए। उनले परराष्ट्रमन्त्री, अर्थमन्त्री र गृहमन्त्रीलाई साम्बाको उपचारका लागि अनुरोधपत्रसहित पहल गर्न आग्रह गरेको बताए।
थापाकाअनुसार परराष्ट्रमन्त्रीले कतारका महामहिमलाई आफ्नै कार्यकक्षमा बोलाएर साम्बाको उपचारका लागि लिखित अनुरोधसमेत गरिसकेको बताएका छन्। यसबारे परराष्ट्रमन्त्रीले आफूलाई फोनमार्फत जानकारी गराएको थापाको भनाइ छ। उनले परराष्ट्रमन्त्रीप्रति आभार व्यक्त गर्दै उक्त पहलबाट उपचारमा सहयोग पुग्ने आशा व्यक्त गरेका छन्।
यसैबिच, एन्फाले अहिलेसम्म उपचारका विषयमा ठोस पहल नगरेकोप्रति थापाले आश्चर्य व्यक्त गरेका छन्। साम्बाको स्वास्थ्य उपचारमा राज्य र सम्बन्धित निकायको सक्रियता आवश्यक रहेको भन्दै उनले सबै खेलप्रेमीलाई साथ दिन आह्वान गरेका छन्।
