काठमाडौँ । काठमाडौँ महानगरपालिकाले सडक किनारा, पार्क तथा नदी करिडोर क्षेत्रमा पैदल यात्रीलाई बस्न सहज होस् भन्ने उद्देश्यले सार्वजनिक कुर्सीको व्यवस्थापन कार्य थालेको छ।
महानगरका अनुसार यो कार्य कुर्सी हटाउने नभई व्यवस्थापन, मर्मत र आवश्यकताअनुसार थपघट गर्ने प्रक्रियाको हिस्सा हो।
यस क्रममा जीर्ण र पुराना कुर्सीको मर्मत, सम्भार तथा रंगरोगन गरिनेछ भने यात्रुको चाप बढी हुने स्थानमा कुर्सीको संख्या थपिनेछ। साथै, एउटै स्थानमा एउटै प्रकारका कुर्सी राखी एकरुपता कायम गर्ने, आकर्षक र प्रयोगमैत्री बनाउने योजना पनि रहेको महानगरले जनाएको छ।
सार्वजनिक निर्माण विभागका प्रमुख सुरेश राईका अनुसार पैदल यात्रुको उमेर समूह र शारीरिक अवस्थालाई ध्यानमा राख्दै सहजता बढाउने काम अघि बढाइएको हो। उनले भने, “यसअघि राखिएका स्थानबाट कुर्सी हटाउने कुनै योजना छैन। एकरुपता कायम गर्न आवश्यक परे साटफेर हुन सक्छ।”
महानगरपालिकाले व्यक्तिहरूको आवतजावत र चापको आधारमा सार्वजनिक कुर्सी थपघट गरिने स्पष्ट पारेको छ।
