काठमाडौँ । नेपाली कांग्रेसका मुख्यसचिव कृष्णप्रसाद पौडेलले आफ्नो पदबाट राजीनामा दिएका छन्। विशेष महाधिवेशनमार्फत नयाँ नेतृत्वसहितको कार्यसमिति चयन भइसकेपछि उनले मुख्यसचिव पदबाट अलग भएको बताएका छन्।
पुस ३० गते गगन थापाको सभापतित्वमा नेपाली कांग्रेसमा नयाँ केन्द्रीय कार्यसमिति गठन भएको थियो।
उक्त कार्यसमितिले भोलि केन्द्रीय कार्यालय सानेपा पुगेर पदभार ग्रहण गर्ने र केन्द्रीय समिति बैठक बस्ने कार्यक्रम तय गरिएको छ। त्यही कार्यक्रमअघि मुख्यसचिव पौडेलले राजीनामा दिएको स्रोतले जनाएको छ। पौडेल राष्ट्रिय सभा सांसदसमेत हुन्।
पौडेलको राजीनामापछि पार्टी सचिव प्रकाश शर्माले केन्द्रीय समिति बैठक बस्नेबारे औपचारिक सूचना जारी गरेका छन्।
यसअघि विशेष महाधिवेशनबाट नयाँ नेतृत्व चयन भइसकेको अवस्थामा पनि पौडेल मुख्यसचिवका हैसियतमा तथा निवर्तमान कार्यवाहक सभापति पूर्णबहादुर खड्काले पार्टीको लेटरप्याड प्रयोग गरी सूचना जारी गर्दै आएको विषयलाई लिएर पार्टीभित्र असन्तुष्टि र विरोधसमेत देखिएको थियो।
