काठमाडौं । आज मन्त्रिरिषदको बैठकपछि एकजना मन्त्रीको हवाला दिँदै एउटा समाचार बाहिरियो प्रधानमन्त्री सुशिला कार्कीले तीनजना मन्त्रीको राजीनामा मागिन् भनेर । ती मन्त्री थिए— कुलमान घिसिङ, जगदिश खरेल र बब्लु गुप्ता ।
यो पनि पढ्नुहोस- मन्त्रीहरूलाई प्रश्न- सरकार छोड्ने कि पार्टी ?
वर्तमान मन्त्रिपरिषदका यी तीन सदस्यलाई तत्कालै राजीनामा दिन प्रधानमन्त्रीले आग्रह गरेको कुरा ती मन्त्रीले बाहिर ल्याए । राजीनामा ती मन्त्रीहरुको कुनै गलत कामले भने प्रधानमन्त्रीले मागेकि थिइनन् । राजीनामा माग्नुपर्नाको कारण उनीहरु राजनीतिक पार्टीमा लागे भनेर थियो ।
वर्तमान सरकारलाई नागरिक सरकार भनिएको छ । गत भदौको जेनजी आन्दोलनपछि राजनीतिक पार्टीको सरकार अपदस्थ गरेर यो नागरिक सरकार गठन गरिएको थियो र सरकारको नेतृत्व पूर्वप्रधानन्यायाधीश सुशिला कार्कीले गरेकी छिन् ।
त्यसैले यो सरकार नागरिक सरकार भएकाले कुनै पनि राजनीतिक दलमा लाग्ने हो भने आफ्नो राजनीतिक अधिकार रहेकाले मन्त्रीबाट राजीनामा दिएर लाग्न प्रधानमन्त्रीको सुझाव थियो । किनभने प्रधानमन्त्री कार्कीले यी तीन मन्त्रीले कुनै न कुनै पार्टीबाट चुनावमा उठ्ने तयारी गरिरहेको जानकारी पाएकि थिइन् ।
कुलमानले नै आफू संरक्षक बसेर उज्यालो नेपाल पार्टी स्थापना गरेको कुरा कोहीबाट लुकेछिपेको छैन । अनुप उपाध्यायलाई पार्टीको अध्यक्ष बनाएर उनले नै सो पार्टी दर्ता गरेका हुन् र निर्वाचन आयोगमा पनि दर्ता गराएका हुन् । पछि सो पार्टीलाई उनले राष्ट्रिय स्वतन्त्र पार्टीमा लगेर समायोजन पनि गराए । त्यो समायोजनको हस्ताक्षर समारोहमा पनि उनी आफैँ उपस्थित छन् र पार्टीका अध्यक्ष भनिएका अनुपलाई नै हस्ताक्षर गराएका छन् ।
कुलमानले अहिले रास्वपाको उपाध्यक्ष नै दाबी गरेका छन् । आफ्नो पार्टीका तर्फबाट पदाधिकारीदेखि केन्द्रीय सदस्य चयन गराएका छन् । त्यतिमात्र नभएर आफ्ना नातेदारलाई नै समानुपातिकमा राख्न लगाएको समाचार आएको छ र उनले माफी नै मागेका पनि छन् ।
त्यतिमात्र नभएर उनले मन्त्रीको गाडीमा झण्डा हल्लाउँदै देशव्यापी रुपमा उज्यालो नेपाल पार्टीको प्रचार गरिरहेका छन् । उता काठमाडौँको ३ नं क्षेत्रबाट चुनाव उठ्ने तयारी गरेका मात्र होइनन् कि सरकारी दलबलसहित घरदैलो नै गरिरहेका छन् ।
यसै आधारमा आज उनीसँग प्रेसले सोध्यो कि तपाईसहित प्रधानमन्त्रीले तीन जना मन्त्रीको राजीनामा मागेको कुरा के सत्य हो ? त्यसको जवाफ उनी यसरी दिन्छन्— म आजका दिनसम्म कुनै पनि पार्टीको सदस्य छैन ।
यो पनि पढ्नुहोस –म कुनै पनि पार्टीको सदस्य छैन कुलमान घिसिङ
यसो सुन्दा त ठिकै हो, उनी कुनै पार्टीको सदस्य छैनन्, उपाध्यक्ष चाहिँ छन् । के पार्टीको उपाध्यक्ष हुनु भनेको सदस्य हुनु होइन र ? किन यसरी ढाँट्न सकेका उनले भन्ने प्रश्न अहिले नागरिकले सामाजिक सञ्जालमा गरिरहेका छन् ।
उनको यो जवाफ दिने शैलीले आज पूर्वमन्त्री पृथ्वी सुब्बा गुरुङको झल्को मेटाएको थियो । उनले पनि मिडियालाई जवाफ दिँदा निकै तौलिएर र हल्का फुल्का पाराले जवाफ दिने गर्दथे । आजको कुलमानको प्रस्तुति पनि त्यस्तै थियो ।
कुलमानको यो काइते कुराको ‘रेस्पोन्स’ प्रधानमन्त्रीले कसरी गर्नेछिन् भन्ने त हेर्न बाँकी नै छ । तर पनि उनको यो जवाफको शैलीले दिनदिनै घटिरहेको मन्त्रीजस्तो पदको गरिमा भने झनै घटाएको छ ।
यसअघि पनि उनले आफूलाई विद्युत प्राधिकरणको एमडी अरु कसैले नभएर नेपाली जनताले बनाएको भनेर भाषण गरेका थिए । यो उनको सस्तो लोकप्रियता मात्र थियो किनभने उनी नेपाली जनताले मत हालेर त्यो पदमा नियुक्त भएका थिएनन्, कुनै न कुनै सरकारले नै उनलाई नियुक्त गरेको थियो ।
एकपछि अर्काे गरी कुलमानको यो अभिव्यक्ति र झुठले उनीमाथि एक प्रकारको अहमता र घमण्ड सवार भएको स्पष्ट देखिएको उनकै निकटस्थहरु पनि बताउन थालेका छन् ।
