काठमाडौँ । फागुन २१ मा हुने निर्वाचनमा सहकार्यको मोडालिटी तय गर्न राष्ट्रिय स्वतन्त्र पार्टी (रास्वपा)का सभापति रवि लामिछाने र काठमाडौं महानगरपालिकाका मेयर बालेन्द्र (बालेन) शाहबीच छलफल तीव्र बनेको छ। दुवै पक्षबीच सहमतिपत्रको पहिलो मस्यौदा तयार भई स्वीकृतसमेत भइसकेको छ।
मेयर शाहले बिहीबार बिहान ऊर्जा, भौतिक पूर्वाधार तथा सहरी विकासमन्त्री तथा ‘उज्यालो नेपाल’का संरक्षक कुलमान घिसिङसँग छलफल गरेका थिए। उक्त छलफलपछि मात्रै उनले रास्वपा सभापति लामिछानेसँग भेटवार्ता गरेका हुन्।
वैकल्पिक राजनीतिक शक्तिहरूबीच सहकार्य गरेर अगाडि बढ्ने उद्देश्यसहित मेयर शाहले विभिन्न राजनीतिक तथा गैरराजनीतिक पक्षसँग संवाद गरिरहेका छन्। छलफलमा संलग्न एक नेताका अनुसार हालका लागि रास्वपा र मेयर शाहबीच मात्रै सहमतिमा पुग्ने तयारी भइरहेको छ।
ती नेताले भने, “अहिले रास्वपा र मेयर बालेनबीच सहमतिको तयारी भइरहेको छ। त्यसअनुसार सहमतिपत्रको मस्यौदा तयार पारिएको छ। दुवै पक्षबीच कुरा मिलिसकेपछि मात्रै उज्यालो नेपालसँग कसरी सहकार्य गर्ने भन्ने विषयमा रास्वपाले छलफल अगाडि बढाउनेछ।”
शुक्रबार बिहानदेखि नै रास्वपा र मेयर शाहका प्रतिनिधिबीच निरन्तर छलफल भइरहेको छ। छलफलमा रास्वपाको तर्फबाट शिशिर खनाल र असिम शाह तथा मेयर बालेनको तर्फबाट कुमार बेन र भूपदेव शाह सहभागी छन्।
छलफलमा संलग्न नेताहरूका अनुसार रवि लामिछाने र बालेन शाहबीच सहमति भएपछि मात्रै उज्यालो नेपालसँग औपचारिक संवाद सुरु गर्ने तयारी छ। उनीहरूले तयार पारेको सहमतिपत्रको पहिलो मस्यौदा दुवै नेताले स्वीकृत गरिसकेका छन्।
स्रोतका अनुसार सभापति लामिछाने र मेयर शाहले उक्त मस्यौदालाई आधार मानेर अर्को चरणको छलफल अगाडि बढाउन निर्देशन दिएका छन्।
