काठमाडौँ — सरकारले चीनका लागि नेपाली राजदूत लीलामणि पौडेललाई फिर्ता बोलाएको छ । सरकारले १५ दिनभित्र नेपाल फिर्ता हुन निर्देशन दिएको बताइएको छ । आइतबार प्रधानमन्त्री निवास बालुवाटारमा बसेको मन्त्रिपरिषद्को बैठकले राजदूत पौडेललाई स्वदेश फर्किन १५ दिने म्याद दिएको विश्वस्त समाचार स्रोतले जानकारी दिएको हो ।
एक मन्त्रीले पौडेललाई फिर्ता बोलाउने निर्णय भएको पुष्टि गरे । उनले फिर्ता बोलाउनुको कारण थाहा नभएको बताए । मन्त्रिपरिषद् बैठकमा किन फिर्ता गराउन लागिएको भन्नेबारे छलफल भएन उनले भने । तर उनी बालुवाटारको ललिता निवास प्रकरणमा विवादमा तानिएका थिए । उनलाई सो विषयमा अख्तियारले बयान पनि लिएको थियो । ती मन्त्रीले उनलाई फिर्ता बोलाउने कारण त्यो पनि हुनसक्ने बताए । यसअघि राष्टपति विद्यादेवी भण्डारीको चीन भ्रमणका क्रममा पनि उनी विवादमा तानिएका थिए ।
चीनमा कोरोना भाइरसको प्रकोप बढिरहेको बेला राजदूतलाई फिर्ता बोलाइएको छ ।