भद्रपुर । नेपाली कांग्रेसका पूर्वमहामन्त्री कृष्णप्रसाद सिटौलाले १४ औँ महाधिवेशनमा सभापतिमा उम्मेदवारी दिने घोषणा गरेका छन् । एक वर्षपछि हुने महाधिवेशनका लागि सिटौलाले गृह नगर झापाबाट सभापतिमा उम्मेदवारी दिने घोषणा गरेका हुन् । सोमबार झापाको भद्रपुरमा आयोजित पत्रकार भेटघाट कार्यक्रममा बोल्दै कांग्रेस नेता सिटौलाले आफूले सभापतिमा उम्मेद्वारी दिने निर्णय गरेको बताए । पार्टीको आमूल परिवर्तनका लागि आफ्नो उम्मेद्वारी आवश्यक रहेको उनको भनाइ छ ।
‘मुलुकको शान्ति प्रक्रियादेखि संविधान निर्माणसम्म पार्टीको तर्फबाट आफ्नो भूमिका उल्लेखनीय रहेको छ, त्यसैले आगामी महाधिवेशनमा उम्मेदवारी दिने सोच बनाएको छु’, सिटौलाले भने । वर्तमान परिस्थितिमा पार्टी सभापति शेरबहादुर देउवा र रामचन्द्र पौडेलबिचको भागबन्डा र गुटबन्दी आवश्यक नरहेको बताउँदै पार्टीको एकताका लागि सबै एकजुट भएर अघि बढ्नु पर्ने धारणा राखे ।
सरकारले गरेको गलत क्रियाकलापको भण्डाफोर गर्नुपर्ने समयमा पार्टीभित्रको गुटबन्दी र आन्तरिक झै झगडामै अलमली रहेको आरोप लगाए । ‘पार्टीका भ्रातृ संस्था तरुण दल र नेविसंघको अधिवेशन पार्टीको महाधिवेशन अगावै गर्न नसकिए पनि प्रेस युनियनको अधिवेशन जुनसुकै परिस्थितिमा गर्नुपर्ने धारणा राखे । सौर्य दैनिक
