काठमाडौँ । काठमाडौंसहित देशभर तापक्रम उकालो लाग्न थालेको छ । बुधबार काठमाडौंमा अधिकतम तापक्रम २३.५ डिग्री सेल्सियस रेकर्ड भएको छ । काठमाडौंमा आइतबार तापक्रम बढ्न सुरु भएको हो । बुधबार धनगढीमा २९, दिपायलमा २७.२, वीरेन्द्रनगरमा २५.८, नेपालगन्जमा २८.६, दाङमा २५.७, पोखरामा २४.५, भैरहवामा २८.७, सिमरामा २९ र विराटनगरमा २८.६ डिग्री रेकर्ड भएको जल तथा मौसम पूर्वानुमान महाशाखाले जनाएको छ । महाशाखाका वरिष्ठ मौसमविद् बरुण पौडेलका अनुसार मुलुकभरि नै न्यूनतम र अधिकतम तापक्रम बढ्दै गएको छ । १ मार्च (फागुन १८) देखि देशैभर तापक्रम बढेको हो ।
जानकारहरूका अनुसार ४ देखि १० डिग्रीसम्म तापक्रम भएको क्षेत्रमा कुनै पनि भाइरस लामो समयसम्म बाँच्न सक्छ । ३० डिग्री हाराहारी तापक्रम पुगेपछि त्यस्ता भाइरस आफैं निष्क्रिय हुँदै जान्छन् । उच्च आर्द्रतालाई भाइरसले मन पराउँदैन । विश्व स्वास्थ्य संगठन (डब्लूएचओ) ले पनि उच्च तापक्रम भएको क्षेत्रमा भाइरस लामो समय बाँच्न नसक्ने उल्लेख गरेको छ । मार्च, अप्रिल, मे र जुन तापक्रम बढी हुने महिना हुन् । मार्चमा काठमाडौंमा औसत २५ देखि ३३ डिग्रीसम्म तापक्रम रेकर्ड हुने गरेको देखिन्छ ।
काठमाडौंको तापक्रम सन् २०१० मार्च २४ मा ३३ डिग्रीसम्म रेकर्ड भएको छ भने सन् १९८९ मे ७ मा ३६.६ डिग्रीसम्म थियो । मौसमविद् पौडेलका अनुसार पोखरामा पनि मार्चमा तापक्रम अधिक रेकर्ड हुने गरेको देखिन्छ । सन् २०१३ मार्चमा त्यहाँको तापक्रम ३८.५ डिग्रीसम्म पुगेको थियो । सन् १९९२ मार्चमा पोखराको तापक्रम ३५ डिग्री थियो । नेपालगन्जमा मार्च र अप्रिल महिनाको तापक्रम करिब ४० डिग्री हाराहारी रेकर्ड हुने गरेको छ । सन् २००४ मार्च २३ मा नेपालगन्जको तापक्रम ३९.८ डिग्री रेकर्ड भएको थियो भने डडेलधुरामा सन् २०१२ मार्चमा ३४.३ डिग्रीसम्म तापक्रम पुगेको देखिन्छ ।
महाशाखाका अनुसार धनगढीमा मार्च, अप्रिल र जुनमा ४० डिग्री हाराहारी तापक्रम रेकर्ड हुने गरेको छ । सन् १९९५ मार्च ५ मा त्यहाँको तापक्रम ४६.४ डिग्रीसम्म रेकर्ड भएको छ । विराटनगर, जनकपुर, धनकुटालगायत क्षेत्रको तापक्रम पनि मार्चदेखि उकालो लाग्ने गरेको छ । सन् १९८६ मार्च ३० मा विराटनगरको तापक्रम ३९.२ डिग्रीसम्म रेकर्ड भएको थियो ।
नयाँ प्रणाली भित्रिँदै:महाशाखाका अनुसार भूमध्यसागरबाट इरान हुँदै बिहीबारसम्म नेपालको पश्चिम भागमा नयाँ मौसमी प्रणाली भित्रिँदै छ । उक्त प्रणाली बुधबार इरान, अफगानिस्तान, पाकिस्तान हुँदै भारतीय वायुमण्डलसम्म आइपुगेको छ । त्यो प्रणाली बिहीबार मुलुकको पश्चिमी भागमा प्रवेश हुने महाशाखाले उल्लेख गरेको छ ।
उक्त प्रणालीका कारण आंशिकदेखि सामान्य बदली रही थोरै स्थानमा मेघगर्जन हुने, चट्याङ पर्ने, हावाहुरी चल्ने र असिनासहित वर्षा हुने महाशाखाले प्रक्षेपण गरेको छ । हिमाली भागमा हिमपातको समेत सम्भावना छ । आइतबारदेखि देशभरको मौसममा सुधार आउनेछ । कान्तिपुर दैनिक
