काठमाडौँ। नेपालको राष्ट्रिय जीवनमा उल्लेखनीय योगदान पुर्याएनुभएका तीन जना विशिष्ट व्यक्तित्वहरुलाई आज यहाँ आयोजित एक कार्यक्रमकाबीच अभिनन्दन गरिएको छ ।
ब्रिजवाटर एजुकेशन फाउण्डेशनले आज नेपाल प्रज्ञा प्रतिष्ठान कमलादीमा कवि एवं प्रस्तोता डा नवराज लम्साल, कलाकार एवं श्रव्य–दृश्य अभिनेता दीपकराज गिरी तथा बैंकिङ एवं वित्ततर्फ नबिल बैंकका मुख्य कार्यकारी अधिकृत (सिइओ) मनोज ज्ञवालीलाई अभिनन्दन गरेको हो ।
कार्यक्रमका प्रमुख अतिथि एवं राष्ट्रिय योजना आयोगका पूर्वउपाध्यक्ष डा जगदिशचन्द्र पोखरेलले स्राष्टालाई सम्मान गर्नु आफैँका निकै ठूलो विषयमा भएको बताउनुभयो । उहाँले भन्नुभयो, “देशका लागि विभिन्न माध्यमबाट योगदान दिने स्राष्टाको सबै क्षेत्रबाट सम्मान हुनु निकै गौरबको विषय हो । स्रष्टा सम्मानित हुँदा काम गर्न थप ऊर्जा प्रदान हुन्छ ।”
फाउण्डेशनका अध्यक्ष दीपक पाण्डेले अभिनन्दित व्यक्तित्वहरू सबैका लागि मार्गदर्शक प्रेरणा स्रोत भएका तथा उहाँहरुको जीवन र कर्मले हामीलाई सही मार्गतर्फ प्रेरित गरिरहने बताउनुभयो । उहाँले भन्नुभयो, “आज तीन जना ख्यातिप्राप्त विशिष्ट व्यक्तित्वहरुलाई सम्मान गर्न पाउँदा ब्रिजवाटर परिवार धन्य भएको छ । आगामी दिनहरुमा पनि यस्ता सम्मानित कार्यक्रमहरुलाई निरन्तरता दिने छौँ ।”
अभिनन्दित हुनु भएका व्यक्तित्वहरूले आफ्नो जीवन, कर्म र अनुभवको सार व्यक्त गर्दै नयाँ पुस्तालाई शिक्षा, साहित्य, कला, संस्कृति, अर्थ, वित्त र मानवीय विकासका लागि आ–आफ्नो कर्म क्षेत्रमा दृढ भई समर्पण र मेहनतका साथ अगाडि बढ्न प्रेरित गर्नु भएको थियो ।
फाउण्डेसनका प्राचार्य कृष्ण पौडेलले समाज र राष्ट्रका पृथक क्षेत्रहरुमा अतुलनीय योगदान पु¥याउनु हुने व्यक्तित्वको सम्मानको संस्कार ब्रिजवाटरको विशिष्ट पहिचान बनिसकेको चर्चा गर्नु हुँदै नवागन्तुक विद्यार्थीको स्वागत एवं पढाइ सकेर जाँदै गरेका विदयार्थीलाई बिदाइ शुभकामना व्यक्त गर्नु भएको थियो ।
कार्यक्रममा कलेजका सहायक प्राचार्य विष्णु शर्माले स्वागत मन्तव्य व्यक्त गर्नुभएको थियो । कलेजले अभिनन्दन समारोह प्रत्येक वर्ष मनाउने गरेको छ । कार्यक्रममा कलेजका शिक्षक, कर्मचारी, विद्यार्थी, पत्रकार, शुभेच्छुक र विभिन्न क्षेत्रका विशिष्ट व्यक्तिहरूको उपस्थिति रहेको सो कार्यक्रमको दोस्रो सत्रमा विविध सांस्कृतिक एवं मनोरञ्जनात्मक कार्यक्रमको प्रस्तुति गरिएको थियो । रासस
