काठमाडौँ। भारत सरकारले ७० मिटर लामो मोड्युलर पुलको पूर्ण सेट र पुल जडान गर्न प्रयोग हुने विशेष उपकरण नेपाल सरकारलाई हस्तान्तरण गरेको छ ।
नेपालका लागि भारतीय राजदूत नवीन श्रीवास्तले हेटौँडामा आज आयोजित एक समारोहबीच भौतिक पूर्वाधार तथा यातायात मन्त्री कुलमान घिसिङलाई उक्त उपकरण हस्तान्तरण गर्नुभएको दूतावासले जनाएको छ ।
पूर्वी नेपाललाई प्रभावित पारेको सन् २०२५ अक्टोबरमा आएको विनाशकारी वर्षापछि नेपाल सरकारले अनुरोध गरेअनुसार भारत सरकारले कूल १० वटा यस्ता ७० मिटर लामो र अग्ला स्प्यान पुलहरु प्रदान गर्न प्रतिबद्ध रहेको जनाएको छ । रु ७३ करोडभन्दा बढी मूल्यका १० वटा बेलिब्रिजहरु भारतले अनुदानका आधारमा प्रदान गर्ने जनाएको छ ।
आज हस्तान्तरण गरिएको मोड्युलर पुललाई तुरुन्तै रामेछापमा जडानका लागि पठाइनेछ । जहाँ सन् २०२५ अक्टोबरमा भारी वर्षा पछि सडक ‘कनेक्टिभिटी’ प्रभावित भएको थियो । गत वर्ष सन् २०२४ सेप्टेम्बरमा आएको बाढी र पहिरोपछि भारत सरकारले रु ४१ करोड बराबरका १० वटा ‘प्री–फ्याब्रिकेटेड’ स्टिल ब्रिज उपलब्ध गराएको थियो जसमध्ये चार वटा जडान भइसकेका छन् ।
कार्यक्रममा मन्त्री घिसिङले भारतको निरन्तर र महत्वपूर्ण सहयोगप्रति कृतज्ञता व्यक्त गर्दै छिटो जडान गर्न सकिने यस्ता पुलहरु तथा पुल जडान गर्न प्रयोग हुने उपकरणहरुको उपलब्धता आपतकालीन पुनर्निर्माणलाई तीव्र गतिमा अघि बढाउन अत्यन्त महत्वपूर्ण हुने उल्लेख गर्नुभयो । साथै उहाँले पुल छिट्टै सञ्चालनमा ल्याइने आश्वासन पनि दिनुभयो ।
राजदूत श्रीवास्तवले मोड्युलर पुल र पुल जडान गर्न प्रयोग हुने विशेष उपकरणहरुको आपूर्ति भारत–नेपाल सम्बन्धलाई परिभाषित गर्ने मित्रताको दिगो सम्बन्धको शक्तिशाली प्रमाण भएको र नेपालको पूर्वाधार विकास र विपद्पछिको पुनर्निर्माण प्रयासहरुका लागि सबै सम्भव सहयोग उपलब्ध गराउने भारत सरकारको नीतिलाई पुष्टि गरेको बताउनुभयो ।
पुनर्निर्माण तथा विपद् न्यूनीकरण प्रयासमा भारत सरकारले नेपाल सरकार र नेपाली जनतालाई निरन्तर सहयोग गर्दै जाने प्रतिबद्ध रहेको जनाएको छ । रासस
