काठमाडौं। हालै एकीकृत भएका वाम घटकहरुले गठित नेपाली कम्युनिस्ट पार्टी (नेकपा) आज औपचारिक रूपमा दल दर्ताका लागि निर्वाचन आयोग पुगेका छन्।
नेकपा माओवादी केन्द्र, एकीकृत समाजवादी लगायत १० वाम घटकहरूको एकता घोषणा पछिको औपचारिक कदमस्वरूप नेताहरू आवश्यक कागजातसहित आयोग पुगेका हुन्।
दल दर्ताका लागि आयोग पुगेका नेताहरूमा वर्षमान पुन, देव गुरुङ, राजेन्द्र पाण्डे लगायतका शीर्ष नेता समावेश छन्।
यसअघि गत २० गते नै नेकपाले दल दर्ताका लागि निवेदन दिएको थियो। आज नेताहरूले सो निवेदनसँगै आवश्यक कागजात पेश गर्दै औपचारिक प्रक्रिया पूरा गरेका हुन्।
पार्टी एकता घोषणापछि ‘नेपाली कम्युनिस्ट पार्टी’ नाम राखिएको नयाँ दलले अब आयोगबाट दर्ता प्रमाणपत्र प्राप्त भएपछि आफ्नो राजनीतिक गतिविधि औपचारिक रूपमा सुरू गर्ने तयारी गरेको छ।
