काठमाडौँ । मलेसियालाई घरेलु मैदानमा स्तब्ध पार्दै नेपालले पाँच खेलको टी–२० सिरिजको उपाधि जितेको छ ।
फाइनलमा मलेसियाले दिएको १०४ रनको लक्ष्य नेपालले पाँच विकेटको क्षतिमा भेट्टाएको हो । योसँगै फाइनलमा पाँच विकेटले हराउँदै नेपालले सिरिज ३–२ ले आफ्नो पोल्टामा पार्यो ।
नेपालको जितमा पूजा महतो र रुबि पोदारले उत्कृष्ट ब्याटिङ गरे । महतोले २३ रन बनाइन् भने पोदारले २६ रन बनाइन् । यस्तै, सम्झना कुमारी खड्काले १० रन जोडिन् । कविता कुँवरले १४ रन बनाउँदा कप्तान इन्दु बर्माले ८ रन जोडिन् ।
घरेलु मैदान वायुमास ओभलमा बुधबार बिहान टस जितेर सुरुमा ब्याटिङ गरेको मलेसियाले ६ विकेटको क्षतिमा १०३ रन बनायो । उसका लागि विन्डर डानियाले ४० रन बनाउँदा माहिरा इज्जाइले १९ रन बनाइन् ।
मलेसियालाई सस्तैमा समेट्न नेपालका लागि राजमती ऐरीले तीन विकेट हात पारिन् भने कविता कुँवरले दुई विकेट लिइन् । नेपालका लागि अर्को एक विकेट रचनाकुमारी चौधरीले हात पारिन् ।
