काठमाडौँ । भारतीय क्रिकेट टोलीका पूर्व कप्तान महेन्द्र सिंह धोनीलाई अन्तर्राष्ट्रिय क्रिकेट परिषद् (आईसीसी)को हल अफ फेममा समावेश गरिएको छ । आइसीसीले सोमबार यो घोषणा गरेको हो ।
धोनी यो सम्मान पाउने ११ औं भारतीय खेलाडी बनेका छन् । यसअघि यो उपलब्धि सुनील गावस्कर, बिसन बेदी सिंह, कपिल देव, अनिल कुम्बले, राहुल द्रविड, सचिन तेन्दुलकर, विनु मांकड, डायना एडुल्जी, विरेन्द्र सहवाग, नितु डेभिडले हासिल गरेका छन् ।
आईसीसीले धोनीको करियरको बारेमा भन्यो, ‘१७,२६६ अन्तर्राष्ट्रिय रन, ८२९ क्याच र ५३८ खेल’ यी तथ्याङ्कले उनको प्रतिभाको मात्र नभई उनको निरन्तरता, फिटनेस र लामो करियरको पनि प्रमाण दिन्छन् ।’
यस सम्मानप्रति प्रतिक्रिया दिँदै धोनीले भने, ‘आईसीसी हल अफ फेममा नाम समावेश हुनु मेरो लागि ठूलो सम्मान हो । विश्वभरका दिग्गज खेलाडीहरूको सूचीमा मेरो नाम देख्नु मेरो लागि गर्वको कुरा हो । म यो क्षणलाई सधैं कदर गर्नेछु ।’
सूचीमा ५ पुरुष र २ महिला क्रिकेटर समावेश
आइसीसीले २०२५ को हल अफ फेमको सूचीमा जम्मा ७ खेलाडीलाई समावेश गरेको छ । जसमा ५ पुरुष र २ महिला खेलाडी छन् ।
पुरुष खेलाडीहरूमा दक्षिण अफ्रिकाका हाशिम अमला, भारतका महेन्द्र सिंह धोनी, अष्ट्रेलियाका म्याथ्यू हेडेन, दक्षिण अफ्रिकाका ग्रीम स्मिथ र न्यूजील्याण्डका डेनियल भेट्टोरी रहेका छन् ।
महिला क्रिकेटरहरूमा पाकिस्तानकी साना मिर र इङ्ग्ल्याण्डकी सारा टेलरले यो सम्मान पाएका छन् ।
तीनवटै आईसीसी ट्रफी जित्ने एकमात्र भारतीय कप्तान
धोनी अहिलेसम्मका एक मात्र भारतीय कप्तान हुन् जसले भारतलाई तीनवटै आईसीसी ट्रफी (२००७ को टी–२० विश्वकप, २०११ को एकदिवसीय विश्वकप र २०१३ को च्याम्पियन्स ट्रफी) मा जित दिलाएका छन् । उनको नेतृत्वमा भारत टेस्टमा पनि नम्बर–१ टोली बन्यो ।
