काठमाडौं । राजावादीहरुले गरेको प्रदर्शनका क्रममा आज पक्राउ परेका राप्रपा नेपालका अध्यक्ष कमल थापासहित ७ जना रिहा भएका छन् ।
राप्रपाका सांसद दीपक सिंह पनि आजै रिहा भएका छन् ।
प्रहरीले आठ जनालाई पक्राउ गरेको थियो । तर साँझ ७ जनालाई जिम्मा जमानीमा छाडिएको हो । एक जना भने प्रहरी हिरासतमै छन् ।
राजावादीहरुलाई पक्राउ गरिएको भन्दै राप्रपाले आपत्ति जनाएको छ ।
भोलि उपत्यका बन्द गर्ने राजावादीको घोषणा
राजावादी समूहले भोलि (जेठ १९ गते) काठमाडौं उपत्यका बन्द गर्ने घोषणा गरेका छन् ।
राजसंस्था पुनस्र्थापनाका लागि गठित संयुक्त जनआन्दोलन समितिका संयोजक नवराज सुवेदीले एक विज्ञप्ति जारी गर्दै भोलि उपत्यका बन्दको घोषणा गरेका हुन् ।
सरकारले आफूहरूको आन्दोलनमा बर्बर दमन गरेको आरोप लगाउँदै राजवादी समूहले आन्दोलनको स्वरुप परिवर्तन गर्न बाध्य भएको जिकिर गरेको छ ।
‘सरकारको बर्बर दमनको विरोध गर्दै हामी आन्दोलनको स्वरुप परिवर्तन गर्न बाध्य भएका छौं । यसै क्रममा भोलि जेठ १९ गते हामीले उपत्यका बन्दको घोषणा गरेका छौं,’ सुवेदीले जारी गरेको विज्ञप्तिमा भनिएको छ ।
त्यस्तै, उपत्यका बन्दको क्रममा आ–आफ्नो टोल र चोकमा बसेर सक्रिय भूमिका निर्वाह गर्न आन्दोलनमा सहभागीहरूलाई विज्ञप्ति मार्फत आह्वान गरिएको छ ।
