काठमाडौँ । नेकपा (एमाले)की सांसद जुलीकुमारी महतोले जनकपुरधामलाई अन्तर्राष्ट्रिय विवाह गन्तव्यका रुपमा विकास गर्नुपर्ने बताउनुभएको छ ।
प्रतिनिधि सभाको मंगलवारको बैठकमा बोल्दै सांसद महतोले यस्तो बताउनुभएको हो । उहाँले सीता–राम विवाहस्थलको धार्मिक पहिचानलाई प्रवद्र्धन गर्दै जनकपुरधामलाई अन्तर्राष्ट्रियस्तरको धार्मिक पर्यटन केन्द्र बनाउने स्पष्ट योजना, प्रभावकारी व्यवस्थापन र समुचित बजेटको आवश्यकता औंल्याउनु भयो ।
उहाँले जनकपुरधामलाई ‘डेस्टिनेसनल वेडिङ हब’को रुपमा विकास गर्न आवश्यकबजेट विनियोन गर्न समेत सरकारसँग माग गर्नुभयो । विश्वभरका हिन्दुधर्मावलम्बीहरुको आस्था र श्रदाको केन्द्र जनकपुरधामलाई अन्तर्राष्ट्रियस्तरको धार्मिक पर्यटनस्तरको विकास गर्नुपर्ने उहाँको माग छ ।
उहाँले भन्नुभयो, ‘जनकपुरधामलाई ऐतिहासिक धार्मिक र सांस्कृतिक महत्वअनुसार अन्तर्राष्ट्रिय विवाह गन्तव्यका रुपमा विकास गर्न अब निर्णायक कदम चाल्न आवश्यक छ । सिता–राम विवाहस्थलका रुपमा यसको पहिचानलाई प्रवद्र्धन गर्दै जनकपुरधामलाई ‘डेस्टिनेसनल वेडिङ हब’ तथा धार्मिक पयर्टन केन्द्र बनाउन स्पष्ट योजना, प्रभावकारी व्यवस्थापन र समुचित बजेटको व्यवस्था गर्न सरकारसँग अनुरोध गर्न चाहन्छु ।’
सांसद महतोले आन्तरिक रोजगारी प्रवद्र्धन गर्न बन्द रहेका उद्योग र कलकारखानाहरु सञ्चालन गर्न समेत सरकारको ध्यानाकर्षण गराउनु भयो ।
