काठमाडौँ । अर्शदीप सिंह र अज्मतुल्लाह उमरजाईले घातक बलिङ गरेपछि पञ्जाब किंग्सले लखनऊ सुपर जायन्ट्स (एलएसजी)लाई ३७ रनले पराजित गर्दै सिजनको सातौं जित दर्ता गरेको छ ।

आइतबार धर्मशालामा खेलिएको आईपीएलको ५४ औं खेलमा टस हारेर पहिले ब्याटिङ गरेको पञ्जाबले प्रभसिमरन सिंहको ९१ रन र कप्तान श्रेयस अय्यरको ४५ रनको मद्दतले २० ओभरमा पाँच विकेट गुमाउँदै २३६ रन बनाएको थियो ।

यो उसको आईपीएलमा चौथो उच्च स्कोर हो । यसैबीच, धर्मशालामा, टोलीले २०११ पछि पहिलो पटक २०० को आँकडा छोएको छ । यसअघि पञ्जाबले आरसीबी विरुद्ध दुई विकेटको क्षतिमा २३२ रन बनाएको थियो ।

जवाफमा लखनउको टोलीले निर्धारित ओभरमा सात विकेट गुमाएर १९९ रन मात्र बनाउन सक्यो ।

उसका लागि आयुष बडोनीले सर्वाधिक ७४ रनको इनिङ खेले । पञ्जाबका लागि अर्शदीप सिंहले तीन र उमरजाईले दुई विकेट लिए । यसबाहेक मार्को यानसेन र युजवेन्द्र चहलले एक–एक सफलता पाए ।

११ खेलमध्ये सात खेल जितेको पञ्जाब १५ अंकसहित अंक तालिकाको दोस्रो स्थानमा पुगेको छ भने लखनउ सिजनको छैटौं हारसँगै सातौं स्थानमा छ ।

लखनउको इनिङ्स
लक्ष्य पछ्याउने क्रममा लखनउको सुरुवात खराब रह्यो । टोलीले ५८ रनको स्कोरमा चार विकेट गुमाएको थियो । एडेन मार्कराम (१३), मिचेल मार्श (०), निकोलस पूरन (६) र ऋषभ पन्त (१८)ले प्रभाव पार्न असफल भए । यस्तो अवस्थामा, आयुष बडोनी र अब्दुल समदले मोर्चा सम्हाले ।

छैटौं विकेटका लागि दुवैले ८१ रनको साझेदारी गरे । यस क्रममा समद २४ बलमा ४५ रन बनाएर आउट भए । त्यसै समयमा, आयुषले ७४ रनको बलियो इनिङ खेल्न सफल भए । तर, उनले टोलीलाई जित दिलाउन सकेनन् । आवेश खान र प्रिन्स यादव क्रमशः १९ र एक रनमा अविजित रहे ।

पञ्जाबको पारी
प्रभसिमरन सिंहको ४८ बलमा ९१ रनको विस्फोटक इनिङको आधारमा पञ्जाब किंग्सले लखनऊ सुपर जायन्ट्स अगाडि २३७ रनको लक्ष्य राखेको थियो । यस खेलमा पञ्जाबले स्तब्ध पार्ने सुरुवात गरेको थियो । पहिलो ओभरमै आकाश सिंहले प्रियांश आर्यलाई आफ्नो शिकार बनाए ।

उनले केवल एक रन मात्र बनाउन सके । यसपछि प्रभसिमरन सिंह र जोश इङ्गलिसले जिम्मेवारी सम्हाले । दोस्रो विकेटको लागि दुवै बीच ४८ रनको साझेदारी भयो । आकाश सिंहले विकेटकिपर ब्याट्सम्यान इङ्गलिसलाई पभेलियनको बाटो देखाए । उनी एक चौका र चार छक्काको मद्दतले ३० रन बनाएर आउट भए ।

५० रनमा दुई विकेट गुमाएको पञ्जाबलाई श्रेयस अय्यर र प्रभसिमरन सिंहले सम्हाले । दुवैले आक्रामक ब्याटिङ गर्दै तेस्रो विकेटको लागि ७८ रन जोडे । दिग्वेश राठीले कप्तान अय्यरलाई मयंक यादवको हातबाट क्याच गराए ।

उनी २५ बलमा ४५ रन बनाएर फर्किए । त्यसै समयमा, प्रभसिमरन सिंहले आफ्नो आईपीएल करियरको दोस्रो शतक बनाउन नौ रनले चुके । लखनउविरुद्ध उनको ब्याटबाट छ चौका र सात छक्का निस्किए । पञ्जाबका लागि नेहल वधेराले १६ रन बनाए भने शशांक र स्टोइनिस क्रमशः ३३ र १५ रनमा अविजित रहे ।

लखनउका लागि आकाश सिंह र दिग्वेश राठीले दुई–दुई विकेट लिए भने प्रिन्स यादवले एक विकेट लिए ।