काठमाडौं । नेकपा एमालेका सांसद ठाकुरप्रसाद गैरेले पूर्वराजा ज्ञानेन्द्र शाहका संवाद सचिव डाफणीन्द्रराज पाठकले संविधान विपरीत समवेदना वक्तव्य निकालेको भन्दै कारबाही गर्न माग गरेका छन् ।
आइतवार प्रतिनिधि सभाको बैठकमा आकस्मिक समयमा बोल्दै गैरेले उक्त विज्ञप्तिमा श्री ५ महाराजाधिराज भनेर उल्लेख भएको भन्दै संविधान र कानूनले मान्यता नदिएको वक्तव्य जारी गर्ने ज्ञानेन्द्र शाह र पाठकमाथि तत्काल कानून बमोजिम कारवाही गर्न सरकारको ध्यानाकर्षण गराए ।
‘नेपालको संविधान र आजको व्यवस्थामा श्री ५ महाराजाधिराज ज्ञानेन्द्र भन्ने कहाँ छ ? यो लेख्न कसरी पाइन्छ । संसद र नागरिक सर्बोच्चताको उपहास गरेर यहाँ बस्न पाइन्छ कि पाइदैन ।’, सांसद गैरेले भने, ‘यो लेख्ने फणिराज पाठक र लेख्न लगाउने ज्ञानेन्द्र शाहमाथि कानून बमोजिम कारवाही गर्न सरकारको ध्यानाकर्षण गराउँछु ।’
साथै, उनले तीनकुने घटनामा पूर्व राजालाई सरकारले जिम्मेवार बनाएर कारवाही गर्नुपर्ने बताए ।
