काठमाडौँ। ललितपुरको भट्टेडाँडाबाट ठूलो परिमाणमा लागुऔषधसहित ४ जना भारतीय नागरिक पक्राउ परेका छन्।
प्रहरीले शनिबार मकवानपुरबाट काठमाडौं उपत्यका ल्याउँदै गरेको अवस्थामा उनीहरूलाई एम्बुलेन्समा लुकाएर राखिएको ९४ हजार थान ट्रामाडोल ट्याब्लेटसहित पक्राउ गरेको हो।
पक्राउ पर्नेहरूमा भारतका २० वर्षीय समीर आलम, ३३ वर्षीय मोहम्मद मुन्ना अन्सारी, ४५ वर्षीय नोर्जान खातुन र २२ वर्षीय एम्बुलेन्स चालक मोहम्मद उमर सिद्धिकी छन्।
जिल्ला प्रहरी परिसर ललितपुरले पत्रकार सम्मेलनमार्फत जानकारी दिँदै एम्बुलेन्स भित्र लुकाएर राखिएको अवस्थामा लागुऔषध बरामद गरिएको जनाएको छ। प्रहरीले ३ थान मोबाइल र एक थान भारतीय नम्बर प्लेट भएको एम्बुलेन्ससमेत बरामद गरेको छ। प्रहरीले अनुसन्धान अघि बढाएको जनाएको छ भने पक्राउ परेका व्यक्तिहरूमाथि लागुऔषध सम्बन्धी कसूरमा मुद्दा चलाइनेछ।
