पर्वत । पर्वतको फलेबास नगरपालिका–४ मुडिकुवामा पहिरोले घर पुरिँदा एक बालिकाको मृत्यु भएको छ । सिर्सुवाका नवीन विकको घर पुरिँदा उनकी ४ वर्षीया छोरी निकिता विकको मृत्यु भएको हो । राति २ बजेदेखि निरन्तर परेको वर्षापछि घरमाथिबाट खसेको पहिरोले पुरिएकी बालिकालाई बिहान करिब ७ बजे स्थानीयले मृत अवस्थामा फेला पारेका हुन् । परिवारका अन्य व्यक्तिहरु भने पहिरो खसिरहेको अवस्थामा भागेर बाँच्न सफल भएको स्थानीय आनन्द गौंडेलले बताए । १२ जनाको संयुक्त परिवार बसेको घरमा पहिरोले क्षति पुर्याएको छ । घर माथिबाट पहिरो खस्न थालेपछि निदाइरहेकी छोरीलाई काखमा लिएर भाग्ने क्रममा ढुंगाले लागेर खसेपछि स्थानीयले खोजी सुरु गरेका थिए । घटनास्थलमा जिल्ला प्रहरी कार्यालय पर्वत र सशस्त्र प्रहरीको टोली पगेर उद्धारमा खटिएको छ । पहिरोले विकका दुई भैंसी र दुई गाईसमेत पुरिएका छन् । त्यस्तै पहिरोबाट स्थानीय रामप्रसाद तिवारीको गोठ भत्किँदा गोरु मरेको छ । सोही पहिरोका कारण करिब १०० रोपनी धानखेतमा पहिरोले क्षति पुगेको छ ।
रातभर परेको वर्षापछि पहिरो खसेर मुडिकुवा र शंकरपोखरीको सिमानास्थित सर्याङ्दीखोलाको पुल पुरिएको स्थानीय झलक शर्मा तिवारीले बताए । उनका अनुसार मुडिकुवाको पाखेबारी भन्ने स्थानबाट करिब एक किलोमिटर तल खसेको पहिरोले पुल पुरिएको हो । पुल पुरिएपछि शंकरपोखरीबाट कुश्मा नगरपालिका आउजाउ अवरुद्ध भएको छ ।
पर्वत प्रहरीका प्रवक्ता एवं निरीक्षक बुद्धिप्रसाद सुवेदीका अनुसार राति पहिरो खसेपछि मध्यपहाडी लोकमार्गको पर्वतखण्ड अवरुद्ध भएको छ । कुश्मा–८ चुवा र कुश्मा–१ पाङको सहस्रधारामा खसेको पहिरोले राजमार्ग अवरुद्ध भएको हो । सहश्रधारामा खसेको पहिरो हटाउन पठाइएको एक्स्काभेटरसमेत पहिरोस्थलमा पुग्न नसकेपछि हटाउन नसकिएको सुवेदीले बताए । कान्तिपुर दैनिक
