काठमाडौं । काठमाडौंको स्वर्णलक्ष्मी सहकारी ठगी प्रकरणमा प्रतिवादी बनाइएका नेपाल प्रहरीका पूर्वडीआईजी छविलाल जोशी अदालतमा उपस्थित भएका छन् ।
पोखराको सूर्यदर्शन सहकारीको बचत रकम ठगी मुद्दामा कास्की जिल्ला अदालतबाट धरौटीमा छुटेका पूर्वडीआईजी जोशी आईतबार काठमाडौं जिल्ला अदालतमा उपस्थित भएका हुन् । उनविरुद्धको मुद्दाको पेसी न्यायाधीश ठाकुरप्रसाद खरेलको इजलासमा तोकिएको छ ।
स्वर्णलक्ष्मी सहकारी ठगी प्रकरणमा३९ जनालाई प्रतिवादी बनाउँदै मुद्दा दायर भएको थियो । यो सहकारीले ६९० बचतकर्ताको एक अर्ब १९ करोड ३० लाख ९० हजार ४९३ रुपैयाँ हिनामिना गरेको आरोप छ ।
स्वर्णलक्ष्मी सहकारी ठगीमै प्रतिवादी बनाईएको राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामिछाने ६० लाख धरौटी बुझाएर रिहा भईसकेका छन् । यस्तै, सहकारीको लेखा समिति सदस्य सुनिता नेवा चार लाख र सञ्चालक समिति सदस्य कमल लामा तीन लाख धरौटी बुझाएर रिहा भएका थिए ।
