लन्डन: बेलायतको निकै लोकप्रिय खेल प्रतियोगिता काराबाओ कप अन्तर्गत शुक्रबार राति भएको खेलमा टोटेनह्याम हस्परले म्यान्चेस्टर युनाइटेडलाई पराजित गरी सेमिफाइनलमा प्रवेश गरेको छ ।
निकै रोमाञ्चक र प्रतिस्पर्धात्मक यस खेलमा एक घण्टाको अवधिमा टोटेनह्यामले ३–० को अग्रता बनाएर जित सुनिश्चित गरेझैं लागेको थियो । टोटेनह्यामका लागि डोमिनिक सोलान्कीले १५ र ५४औं मिनेटमा गोल गरेका थिए भने कुलुसेभ्स्कीले ४६ औं मिनेटमा गोल गरेर खेललाई आफ्नो पक्षमा पारेका थिए ।
तर युनाइटेडका जोसुआ झिर्कीले ६३औं मिनेट र अमाद डियालोले ७०औं मिनेटमा गोल गरेर युनाइटेडलाई खेलमा फर्काएका थिए ।
यतिमै खेलको रोमाञ्च सकिएको थिएन । ८८औं मिनेटमा टोटेनह्यामका लागि सन मिनले अर्को गोल गरेर ४–२ को अग्रता बनाएका थिए । खेलको अन्ततिर अतिरिक्त समयमा युनाइटेडका लागि जोनी इभान्सले गोल गरेका थिए । तर त्यसपछि भने कुनै गोल भएन र समग्रमा टोटेनह्यामले युनाइटेडलाई ४–३ गोल अन्तरले पराजित गर्यो ।
यससँगै कारबाओ कपबाट म्यान्चेस्टर युनाइटेड बाहिरिएको छ ।
अब सेमिफाइनलमा टोटेनह्यामले लिभरपुलको सामना गर्नेछ । अर्को सेमिफाइनलमा भने आर्सनल र न्यूक्यासल युनाइटेडबीच भिडन्त हुनेछ ।
