एजेन्सी । अल्लु अर्जुन र रश्मिका मन्दना स्टारर फिल्म ‘पुष्पा–२’ ले ६ दिनमै १ हजार २ करोड कमाएको छ । योसँगै छोटो समयमा १००० करोड क्लबमा सामेल हुने पहिलो भारतीय फिल्म बनेको छ ।
व्यापार विज्ञ तरण आदर्शका अनुसार पुष्पा २ ले मंगलबारसम्म हिन्दी संस्करणबाट ३ सय ७५ करोड रुपैयाँ कमाएको छ । शुक्रबारसम्म यो फिल्म ५०० करोड क्लबमा सामेल हुन सक्छ ।
चलचित्र ‘पुष्पा–२’ ले ओपनिङ डे कलेक्सनको कुरा गर्दा विश्वभर २९४ करोड कमाएको थियो । जसमा भारतीय बक्स अफिसमा फिल्मको कलेक्सन १७५.१ करोड थियो । पुष्पा–२ ले हिन्दी संस्करणमा ७२ करोड कमाएको थियो । योसँगै फिल्मले एसएस राजामौलीको फिल्म आरआरआरको रेकर्ड पनि तोडेको छ ।
‘पुष्पा–२’ ले रिलिज भएको ३ दिनमै हिन्दी बेल्टमा २०५ करोड कमाएर शाहरुखको ‘जवान’को कीर्तिमान तोडेको छ । जवानले तीन दिनमा १८० करोड कमाएर कीर्तिमान बनाएको थियो ।
‘पुष्पा–२’ तमिल, तेलुगु, मलयालम, कन्नड र हिन्दी गरी ५ भाषामा रिलिज भएको छ । फिल्ममा अल्लु अर्जुन फेरि पुष्पाराजको भूमिकामा देखिएका छन् । रश्मिका मन्दना पनि श्रीवल्लीको अवतारमा देखिएकी छिन् । यस्तै फहाद फासिल प्रहरी भनवर सिंह शेखावतको भूमिकामा छन् ।
फिल्मको लेखन र निर्देशन सुकुमारले नै गरेका छन् ।
