काठमाडौं: नेपाल र चीनबीच हुने भनिएको बेल्ट एन्ड रोड इनिसिएटिभ (बिआरआई) फ्रेमवर्कमा अन्यौलबीच दुबै देशबीच अन्तत: सहमति भएको छ ।
नेपालले अघि सारेको परिमार्जित बिआरआई फ्रेमवर्कलाई चीनले स्वीकार गरेको बेइजिङमा रहेको प्रधानमन्त्री केपी शर्मा ओलीको भ्रमणदलमा रहेका एक सदस्यले न्यूजपोलारलाई बताएका छन् । उक्त सम्झौतामा सम्भवत: बेइजिङमा हस्ताक्षर हुनेछ ।
प्रधानमन्त्री केपी शर्मा ओली र उहाँका चिनियाँ समकक्षी लि छ्याङ एवं राष्ट्रपति सी चिनफिङ बीच भएका भेटवार्तामा नेपालले फ्रेमवर्कमा सहमति जनाउन चिनिया पक्षलाई आग्रह गरेको थियो ।
बिआरआई अन्तर्गत चीनले नेपालका विकास परियोजनामा ऋण र अनुदान दुबै सहायता प्रदान गर्ने सम्भावना छ जसका लागि दुबै पक्षले आयोजनाहरु पहिचान गर्नेछन् । त्यस्ता आयोजनामा आवश्यक पर्ने रकमको मोडालिटी समेतका विविध विषयमा छलफल भएर निष्कर्षमा पुग्न भने बाँकी छ ।
प्रधानमन्त्री केपी शर्मा ओलीले चीन भ्रमणमा जानुअघि बिआरआई फ्रेमवर्कका बारेमा सत्तारुढ दलहरुसँग सहमति जुटाउनु भएको थियो । उक्त फ्रेमवर्कमा काम गर्न चीन राजी भएको स्रोतको भनाई छ ।
