काठमाडौं। साफ महिला च्याम्पियनसिप फुटबलको फाइनलका लागि बुधबार बिहान टिकट विक्री खुला गरिने भएको छ ।
टिकट बुधबार विहान ८ बजेबाट जावलाखेलको फुटबल मैदान, एन्फा कम्प्लेक्स र भद्रकाली आर्मी गेटबाट विक्री हुने अखिल नेपाल फुटबल संघ(एन्फा)ले जनाएको छ ।
अधिकतम १० हजार टिकट विक्री गरिने एन्फाले जनाएको छ । एक जनाले अधिकतम २ वटा भीआईपी र ५ वटा साधारण प्यारापिटको टिकट लिन सक्नेछन् ।
फाईनलको लागि अनलाइन टिकट बन्द गरिएको छ । यसअघि बुकिङ भइसकेका अनलाइन टिकटको पैसा फिर्ता गरिने एन्फाले जनाएको छ ।
आइतबार साँझ भएको नेपाल र भारतबीचको सेमिफाइनलमा दशरथ रंगशालाको दर्शक क्षमताभन्दा बढि टिकट बिक्री गरेको पाइएपछि एन्फा आफैले टिकट विक्री गर्न लागेको हो ।
नेपाल र बङ्गलादेशबीचको फाइनल खेल भोलि साँझ ६ः३० बजे हुँदै छ ।
