काठमाडौं । सहकारीको रकम अपचलनको आरोपमा पक्राउ परेका राष्ट्रिय स्वतन्त्र पार्टीका सभापतिसमेत रहेका गोर्खा मिडिया ग्रुपका तत्कालीन प्रबन्ध निर्देशक रवि लामिछानेलाई म्याद थपका लागि आज अदालत लगिँदै छ ।
कास्की प्रहरीको हिरासतमा राखिएका लामिछानेको बयानसमेत नसकिएकाले म्याद थपका लागि आज कास्की जिल्ला अदालत लग्न लागिएको हो । रवि गत शुक्रबार काठमाडौंमा पक्राउ परेका थिए । लगत्तै उनलाई पोखरा लगिएको थियो । उनलाई अदालतको अनुमति लिएर ६ दिन हिरासतमा राखिएको थियो । अदालतबाट पाएको अनुमति हिजो सकिएकाले आज पुन: म्याद थपका लागि लैजान लागिएको हो ।
जिल्ला सरकारी वकिलको कार्यालयको रोहबरमा प्रहरीले रविसँग बयान लिने क्रम जारी छ । आज पनि उनीमाथि बयान हुने छ ।
यता राष्ट्रिय स्वतन्त्र पार्टीले भने बयान लम्ब्याइएको भन्दै आपत्ति जनाएको छ । बयान लिन ढिलाइ गरेर हिरासतमा राख्ने अवधि लम्ब्याउने षड्यन्त्र भएको दाबी रास्वपाले लगाएको हो । यो कानुनी प्रक्रिया नभएर सत्यलाई दबाबउने प्रयास भएको उसको ठहर छ ।
रास्वपाले लामिछानेलाई थुनामा राख्नुपर्ने कानुनी आधार नै नभएको दाबी गरेको छ । भागी जाने, प्रमाण नष्ट गर्ने, वा कुनै हानीकारक कार्य गर्ने अवस्था भएमा मात्र हिरासत आवश्यक हुने भन्दै रास्वपाले देशको चौथो ठूलो राजनीतिक दलका सभापति र संघीय सांसद रहेका रवि लामिछानेमा यस्ता कुनै पनि अवस्था लागू नहुने जिकिर गरेको छ । उनलाई थुनामा राख्नु राजनीतिक प्रतिशोध बाहेक अरू केही नभएको उसको निष्कर्ष छ ।
