एजेन्सी । महिला टी–२० विश्वकप बंगलादेशबाट सर्ने सम्भावना छ । प्रतियोगिता अक्टोबर ३ देखि २० सम्म हुने छ । बंगलादेशमा राजनीतिक अस्थिरताका कारण अन्तर्राष्ट्रिय क्रिकेट काउन्सिलले यसलाई सार्न निर्णय गर्न सक्छ ।
युएई महिला विश्वकप आयोजना गर्ने विकल्पमा सबैभन्दा अगाडि छ । तर, श्रीलंका र जिम्बाब्वे क्रिकेट बोर्डले पनि बंगलादेशबाट सारिएमा त्यहाँ प्रतियोगिता आयोजना गर्न चासो देखाएको छ ।
मिडिया रिपोर्टका अनुसार युएई बंगलादेशबाट सारियो भने महिला टी–२० विश्वकप आयोजना गर्ने बलियो दावेदार हो । युएईको दुबई, अबु धाबी र शारजाहमा अन्तर्राष्ट्रिय स्टेडियमहरू छन् । युएईले यसअघि नै टी–२० विश्वकप आयोजना गरिसकेको छ ।
कोरोनाका कारण सन् २०२१ मा भारतमा हुने पुरुष टी–२० विश्वकप युएईमा आयोजना भएको थियो । यद्यपि यो भारतीय क्रिकेट कन्ट्रोल बोर्ड (बीसीसीआई)ले आयोजना गरेको थियो ।
महिला टी–२० विश्वकप अक्टोबर ३ देखि २० सम्म बंगलादेशमा हुने तय भएको थियो । यस विश्वकपमा १० टोलीको सहभागिता रहनेछ । १८ दिनमा २३ खेलहरू हुनेछन् । समूह ए मा भारत र ६ पटकको च्याम्पियन अस्ट्रेलिया एकै समूहमा छन् ।
यस बाहेक यो समूहमा पाकिस्तान, न्युजिल्यान्ड र छनोटको टोली समावेश छ । समूह ‘बी’ मा आयोजक बंगलादेश, इंग्ल्याण्ड, दक्षिण अफ्रिका, वेस्ट इन्डिज र क्वालिफायर–२ टोली छन् ।
