मिलान । क्रिस्टियानो रोनाल्डोले गरेको दुई गोलमा इटालीको सिरी एमा युभेन्टसले शनिबार पार्मालाई ४–० ले हराएको छ । डिफेन्डिङ च्याम्पियनका लागि यस सिजनका ९ खेलमा रोनाल्डोको यो बाह्रौं गोल हो ।
युभेन्टसका लागि डेजान कुलुसेभ्स्की र अल्भारो मोराटाले पनि गोल गरे । कीर्तिमानी दसौं लगातार लिग उपाधिको पछाडि रहेको युभेन्ट्सको अब २७ अंक भएको छ । यो दोस्रो स्थानमा रहेको इन्टर मिलानसँग बराबरी हो । यस्तै युभेन्टस शीर्ष स्थानमा रहेको एसी मिलानसँग भने एक अंकको दूरीमा छ ।
पार्मा भने १२ अंकसाथ १५ औं स्थानमा छ । शनिबारको अर्को खेलमा साम्पडोरियाले क्रोटोनलाई ३–१ ले पराजित गर्यो ।
