वीरगन्ज । मधेस प्रदेशका मुख्यमन्त्री सतिस सिंहले असार २१ गते विश्वासको मत लिने भएका छन् ।
मुख्यमन्त्री सिंहले यही २१ गते विश्वासको मत लिने तयारी भएको मुख्यमन्त्री तथा मन्त्रीपरिषद्को कार्यालयले जनाएको छ ।
प्रदेश प्रमुख सुमित्रा भण्डारीले २५ जेठमा सिंहलाई मुख्यमन्त्रीमा नियुक्त गरेकी थिइन् । संविधानको धारा १६८ (४)अनुसार मुख्यमन्त्री नियुक्त भएको ३० दिनभित्र सांसदबाट विश्वासको मत लिनुपर्ने व्यवस्था छ । जसअनुसार मुख्यमन्त्री सिंहले २२ गतेभित्र सदनबाट विश्वासको मत लिइसक्नुपर्ने हुन्छ ।
जनमत संसदीय दलका नेता सिंह एमालेका २४, माओवादीका ९, जनमतका १३, एकीकृत समाजवादीका ७, राप्रपाका १ र नेपाल सङ्घीय समाजवादीका एक जना सांसदहरुको समर्थनमा मुख्यमन्त्री बनेका थिए ।
