एजेन्सी । दिल्लीका मुख्यमन्त्री अरविन्द केजरीवाल दिल्लीको मदिरा नीति घोटालासँग जोडिएको सम्पत्ति शुद्धीकरण मुद्दामा अन्तरिम जमानतको म्याद शनिबार सकिँदै गर्दा आइतबार तिहाड जेलमा फर्कँदै छन् ।
केजरीवाललाई सर्वोच्च अदालतले मे १० मा लोकसभा चुनावको प्रचारका लागि अन्तरिम जमानत दिएको थियो र २ जुनमा तिहाड जेलमा आत्मसमर्पण गर्न भनिएको थियो ।
आइतबार तिहाड जेल जानुअघि उनले कार्यकर्तालाई भने, ‘म देश बचाउन जेल जाँदैछु ।’ लोकसभा एक्जिट पोलमा उनले भने कि यी सबै नक्कली एक्जिट पोल हुन् ।
यसअघि उनी महात्मा गान्धीको समाधिमा श्रद्धाञ्जली अर्पण गर्न राजघाट गएका थिए । त्यसपछि उनी कनाट प्लेसस्थित हनुमान मन्दिर पनि गए । जहाँ उनले पुजा गरे ।
अब केही बेरमै उनी तिहाड जेल जानेछन् । यसअघि उनले भने, ‘मलाई जेलमा सबैको चिन्ता हुनेछ । तिमी खुसी छौ भने तिम्रो केजरीवाल पनि खुसी हुनेछन् ।’
जमानत दिएकोमा केजरीवालले सर्वोच्च अदालतलाई धन्यवाद दिएका छन् । उनले आज एक्स (ट्वीटर)मा लेखेका छन्– ‘सर्वोच्च अदालतको आदेशमा म २१ दिन चुनावी प्रचारका लागि निस्केको हुँ । यसका लागि सर्वोच्च अदालतलाई धेरै धेरै धन्यवाद ।’
दिल्लीका मुख्यमन्त्रीले यसअघि अन्तरिम जमानतको म्याद थपका लागि सर्वोच्च अदालतमा अपिल गरेका थिए ।
बुधबार सर्वोच्च अदालतले उनको निवेदन खारेज गर्दै उनलाई नियमित जमानतका लागि ट्रायल कोर्ट जाने स्वतन्त्रता दिइएकाले यहाँको निवेदन विचारणीय नभएको बताएको थियो ।
