एजेन्सी । इन्डियन प्रिमियर लिग (आईपीएल) अन्तर्गत आज सनराइजर्स हैदरावादले लखनउ सुपर जाइन्ट्सको सामना गर्दैछ । खेल बेलुका ७ः४५ बजेदेखि हैदरावादको राजीव गान्धी अन्तर्राष्ट्रिय रंगशालामा हुनेछ । दुवै टोली यो सिजन पहिलो पटक आमनेसामने हुँदैछन् ।
दुवैको सिजनको यो १२ औं खेल हुनेछ। दुवै टोलीले ११ खेलमध्ये ६ मा जित र ५ खेलमा हार बेहोरेका छन् । राम्रो रन रेटका कारण हैदराबाद चौथो स्थानमा र लखनउ पाँचौं स्थानमा छ । आजको खेल जित्ने टोलीको प्लेअफको सम्भावना बढ्नेछ ।
आईपीएलमा हैदरावादले अहिलेसम्म लखनउलाई हराउन सकेको छैन । हैदरावाद र लखनउबीच लिगमा हालसम्म ३ खेल भएका छन् । लखनउले सबै तीनै खेल जितेको छ ।
यस सिजन हैदरावादका ब्याट्सम्यान राम्रो लयमा छन् । तीन ब्याट्सम्यानले तीन सयभन्दा बढी रन बनाएका छन् । जसमा ट्राभिस हेड, हेनरिक क्लासेन र अभिषेक शर्मा छन् । हेड ४ सय ४४ रन बनाएर टिमका सर्वाधिक स्कोरर हुन् । बलरमा टी नटराजन र कप्तान प्याट कमिन्सले राम्रो प्रदर्शन गरिरहेका छन् । नटराजन १५ विकेट लिएर टोलीका सर्वाधिक विकेट लिने खेलाडी हुन् ।
लखनउमा कप्तान केएल राहुल बाहेक मार्कस स्टोइनिस र निकोलस पूरनले पनि उत्कृष्ट ब्याटिङ गरिरहेका छन् । तीनै जनाको नाममा ३०० भन्दा बढी रन छन् । राहुलले ११ खेलमा ४३१ रन बनाएका छन्, उनी टोलीका लागि सर्वाधिक रन बनाउने खेलाडी हुन् । बलिङमा यश ठाकुर शीर्ष स्थानमा छन् । उनले ११ विकेट लिएका छन् ।
