एजेन्सी । इन्डियन प्रिमियर लिग (आईपीएल २०२४) मा मंगलबार दिल्ली क्यापिटल्सले राजस्थान रोयल्सलाई २० रनले पराजित गर्यो ।
राजस्थानका कप्तान सञ्जु सामसनले आफ्नो ८६ रनको इनिङ्समा ६ छक्का प्रहार गरे, योसँगै उनको आईपीएलमा २०० छक्का पूरा भयो । उनी यो माइलस्टोनमा सबैभन्दा छिटो पुग्ने भारतीय बने ।
यसका लागि उनले १५९ इनिङ्स मात्र लिए र सबैभन्दा कम इनिङ्समा २०० छक्का प्रहार गर्ने भारतीय बने । उनले १६५ इनिङ्समा २०० छक्का प्रहार गर्ने एमएस धोनीको कीर्तिमान तोडे ।
सामसनले आईपीएलमा ५६ औं पटक राजस्थान रोयल्सको कप्तानी गरेका छन् । योसँगै उनी सबैभन्दा धेरै खेलमा राजस्थानको कप्तानी गर्ने खेलाडी बनेका छन् । उनले शेन वार्नलाई पछाडि छोडे, वार्नले ५५ खेलमा राजस्थानको कप्तानी गरेका थिए । सामसन र वार्न राजस्थानका सबैभन्दा सफल कप्तान पनि हुन्, दुबैले टोलीका लागि ३०–३० खेल जितेका छन् ।
दिल्लीविरुद्ध उनले ६ छक्का प्रहार गरेका थिए । उनले आईपीएलमा १२ औं पटक एक पारीमा ५ वा सोभन्दा बढी छक्का प्रहार गरेका छन् । उनी प्रतियोगितामा सबैभन्दा धेरै पटक ५ प्लस छक्का प्रहार गर्ने पहिलो भारतीय बने । उनीसँगै केएल राहुलले पनि १२ इनिङ्समा ५ प्लस छक्का प्रहार गरेका छन् ।
