काठमाडौँ । आईपीएल–२०२४ को ४६ औं खेलमा चेन्नई सुपर किंग्सले सनराइजर्स हैदरावादलाई ७८ रनले पराजित गरेको छ । टोलीले चालू सिजनमा पाँचौं जित हासिल गरेको छ ।
यो जितसँगै चेन्नई अंक तालिकाको तेस्रो स्थानमा उक्लिएको छ । चेन्नईले लगातार दुई खेलको हारपछि जित निकालेको हो । जबकि हैदरावादले सिजनमा पहिलो पटक लगातार दोस्रो खेल हार्यो । सनराइजर्स अंक तालिकाको चौथो स्थानमा छ ।
चेन्नईको चेपौक रंगशालामा आइतबार भएको खेलमा सनराइजर्स हैदरावादले टस जितेर पहिले बलिङ रोजेको थियो । चेन्नईले २० ओभरमा ३ विकेट गुमाएर २१२ रन बनाएको थियो । जवाफमा हैदरावाद १८.५ ओभरमा १३४ रनमै सीमित भयो । खेलको प्लेयर अफ द म्याच रुतुराज गायकवाड भए । उनले ५४ बलमा ९८ रनको इनिङ खेले ।
घरेलु मैदानमा हैदरावादलाई पराजित गर्दै चेन्नईले बराबरी गरेको हो । यसअघि हैदरावादमा भएको खेलमा एसआरएचले ६ विकेटले जित हात पारेको थियो ।
सीएसकेका कप्तान रुतुराज गायकवाडले ५४ बलमा ९८ रनको इनिङ खेले भने डेरिल मिचेलले ३२ बलमा ५२ रन बनाए । शिवम दुबेले अविजित ३९ रनको योगदान दिए । भुवनेश्वर कुमार, टी नटराजन र जयदेव उनादकटले एक–एक विकेट लिए ।
एसआरएचका लागि एडेन मार्करामले सर्वाधिक ३२ रन बनाए । हेनरिक क्लासेन २० रन बनाएर आउट भए । रन पछ्याउने क्रममा हैदरावादको टोलीले लगातार विकेट गुमाएको थियो । टोलीले ३२ रनभन्दा बढीको साझेदारी गर्न सकेन ।
चेन्नईका तुषार देशपाण्डेले ४ विकेट लिए । मथिश पाथिराना र मुस्ताफिजुर रहमानले २–२ विकेट लिए । रवीन्द्र जडेजा र शार्दुल ठाकुरले १–१ विकेट लिए ।
