काठमाडौँ । आईपीएल २०२४ को ४२ औं खेलमा, पञ्जाब किंग्सले इतिहास रच्यो र टी–२० क्रिकेट र लिगको इतिहासमा उच्चतम स्कोरलाई पछ्यायो । कोलकाता नाइट राइडर्सले २ सय ६२ रनको लक्ष्य दिएको पञ्जाबले ८ बल बाँकी रहँदै पूरा गरेको थियो ।
२६२ रनको लक्ष्य पछ्याउँदै पञ्जाबले टी–२० क्रिकेटमा सबैभन्दा ठूलो लक्ष्य पछ्याउने वर्षौं पुरानो कीर्तिमान तोडेको छ ।
गत वर्ष सेन्चुरियनमा दक्षिण अफ्रिकाले वेस्ट इन्डिजलाई २५९ रनको लक्ष्य पछ्याएको थियो । योसँगै पञ्जाबले आईपीएलमा सबैभन्दा ठूलो चेसको चार वर्ष पुरानो कीर्तिमान पनि तोडेको छ ।
२०२० मा, राजस्थानले शारजाहमा पञ्जाबविरुद्ध २२४ रनको सफल लक्ष्य पछ्याएको थियो । पञ्जाबले यो कीर्तिमान तोड्यो ।
यस खेलमा कुल ५२३ रन बनाइएको थियो, जुन कुनै पनि आईपीएल खेलमा दोस्रो उच्च कुल (एग्रीगेट) रन हो । यसै सिजनमा रोयल च्यालेन्जर्स बैंगलोर र सनराइजर्स हैदरावादबीचको खेलमा चिन्नास्वामीमा दुबै इनिङ्समा ५४९ रन बनाएका थिए, जुन सबैभन्दा धेरै थियो । यसै सिजनमा सनराइजर्स हैदरावाद र मुम्बई इन्डियन्सबीच हैदरावादमा भएको खेलमा पनि दुवै इनिङ्समा संयुक्त ५२३ रन बनेको थियो ।
यस खेलमा पञ्जाबले २४ छक्का प्रहार गरेको छ, जुन आईपीएल खेलको एउटै इनिङ्समा कुनै पनि टोलीले प्रहार गरेको सर्वाधिक छक्का हो ।
यसअघि यसै सिजनमा चिन्नास्वामीमा बैंगलोरविरुद्ध सनराइजर्स हैदरावादले २२ छक्का प्रहार गरेको थियो । योसँगै टी–२० क्रिकेटमा एकै इनिङ्समा छक्का प्रहार गर्ने यो दोस्रो ठूलो संख्या हो । पञ्जाबभन्दा अघि नेपाली टोली मात्र अगाडि छ । नेपालले सन् २०२३ को एसियाली खेलकुदमा मंगोलियाविरुद्ध २६ छक्का प्रहार गरेको थियो ।
यस खेलमा दुवै इनिङ्ससहित कुल ४२ छक्का प्रहार गरिएको थियो । पञ्जाबबाट २४ छक्का बाहेक कोलकाताबाट १८ छक्का प्रहार गरिएको थियो । ४२ छक्का कुनै टी–२० खेलमा सबैभन्दा धेरै छक्काको रेकर्ड हो ।
यस्तो रह्यो खेल
टस हारेर पहिले ब्याटिङ गरेको कोलकाताले २० ओभरमा ६ विकेट गुमाएर २६१ रन बनाएको थियो । फिल साल्टले ३७ बलमा ७५ रन र सुनिल नारायणले ३२ बलमा ७१ रन बनाए । जवाफमा प्रभसिमरन सिंहले २० बलमा ५४ रनको इनिङ खेल्दै पञ्जाबलाई आक्रामक सुरुवात गराए । यसपछि जोनी बेयरस्टोले ४८ बलमा १०८ रन र शशांक सिंहले २८ बलमा ६८ रनको अविजित इनिङ खेल्दै पञ्जाबलाई जित दिलाए ।
