काठमाडौं । राष्ट्रिय प्रजातन्त्र पार्टीले गत चैत २७ गते काठमाडौंमा भएको जनप्रदर्शनका क्रममा प्रहरीले गरेको दमनको विरोध गर्दै देशभर मसाल जुलुस निकालेको छ ।
राप्रपाको आन्दोलनका क्रममा प्रहरीको कुटाइबाट घाइते भएका बर्दियाका राप्रपाका नेता ठाकुरप्रसाद डाँगीको उपचारका क्रममा निधन भएको थियो । राप्रपाले प्रहरीको दमनबाट आफ्नो नेताको मृत्यु भएको आरोप लगाउँदै आएको छ ।
राप्रपाले मृतक डाँगीलाई सहिद घोषणा गर्न माग गरेको छ । मसाल जुलुस प्रदर्शनमा सहभागी राप्रपाका कार्यकर्ताले गृहमन्त्री रवि लामिछानेको राजीनामा माग गरेका छन् ।
चैत २७ गते राप्रपाले काठमाडौंमा गरेको जनप्रदर्शनका क्रममा प्रहरीसँग झडप हुँदा बर्दियाका जिल्लास्तरीय नेता ठाकुरप्रसाद डाँगीको मृत्यु भएको थियो । उनै डाँगीको १३ औं तिथिका अवसरमा राप्रपाले प्रदर्शन गरेको हो ।
