काठमाडौं । काठमाडौं महानगरपालिकाले अग्रपंक्तिमा खटिने करिब १ हजार ६ सय कर्मचारीलाई कोरोना खोप लगाउने भएको छ । सरकारले तोकेका राजधानीका दुई अस्पतालमा ती कर्मचारीले खोप लगाउने व्यवस्था गरेको छ । कामपा जनस्वास्थ्य महाशाखा प्रमुख हरिबहादुर कुँवरले राजधानीको टेकु र वीर अस्पतालमा खोप लगाउने व्यवस्था गरिएको जानकारी गराउनुभयो ।
उहाँले फोहोर व्यवस्थापनमा कार्यरत ९ सय ५०, करिब १ सय ५० स्वाथ्यकर्मी र सबै वडाका ५ सय ४३ स्वास्थ्य स्वयंसेविकलाई खोप लगाउने व्यवस्था गरिएको जानकारी दिनुभयो । कामपाले अग्रपंक्तिमा खटिएका कर्मचारीलाई अनलाइनमार्फत फाराम भर्न लगाउने र दिन तोकेर खोप लगाउने व्यवस्था गर्न लागेको हो ।
महानगरले स्वाब संकलनमा खटिएका, घर–घरमा कोभिड संक्रमितलाई सेवा दिइरहेका, फोहोर व्यवस्थापनमा कार्यरत कर्मचारीलाई खोप लगाउने व्यवस्था गर्न लागेको हो । स्वास्थ्य तथा जनसंख्या मन्त्रालयले कोभिड खोप लगाउन राजधानीका वीर र टेकु अस्पतालाई जिम्मा दिएको छ । पहिलो चरणमा अग्रपंक्तिका कर्मचारीलाई खोप लगाउने व्यवस्था गरेलगत्तै दोस्रो चरणको खोपबारे कार्ययोजना बनाउने तयारी भइरहेको विभागीय प्रमुख कुँवरको भनाइ छ ।
सरकारले उपत्यकाका दुई महानगरसहित सबै नगरपालिकाका कोभिड रोकथाममा खटिएका कर्मचारीलाई पहिलो सूचीमा राखेर खोप लगाउने योजना बनाएको छ । कुँवरले पहिलो प्राथमिकतामा परेका कर्मचारीलाई केही दिनभित्र खोप लगाउने व्यवस्था गरिएको जानकारी दिनुभयो । स्वाथ्य तथा जनसंख्या मन्त्रालयले मंगलबार प्रधानमन्त्री निवास बालुवाटारमा विशेष कार्यक्रम आयोजना गरी कोभिड–१९ खोप लगाउने कार्यको थालनी गर्नेछ । नेपाल समाचारपत्र दैनिक
