एजेन्सी । रोयल च्यालेन्जर्स बैंगलोर (आरसीबी)का अनुभवी विकेटकिपर/ब्याट्सम्यान दिनेश कार्तिकले यो उनको अन्तिम आईपीएल सिजन हुने पुष्टि गरेका छन् । कार्तिकले स्काई स्पोर्ट्स पोडकास्टमा इंग्ल्याण्डका पूर्व कप्तान नासेर हुसेन र माइकल एथर्टनसँगको कुराकानीमा यो खुलासा गरेका हुन् ।
दिनेश कार्तिक पनि यतिबेला कमेन्ट्री गरिरहेका छन् र यस्तो अवस्थामा दुवैलाई सन्तुलनमा राख्न गाह्रो भएको बताएका छन् । त्यसैले क्रिकेट छोड्ने यो उपयुक्त समय रहेको बताउँछन् ।
दिनेश कार्तिकले भने, ‘म पक्का छु कि यो मेरो अन्तिम आईपीएल हुनेछ । म किन प्रतिज्ञा गर्न सक्दिन, मलाई थाहा छैन । मानिसको दिमाग धेरै घुमिरहन्छ ।’ नासिर हुसेनले कार्तिकलाई जिस्काउँदै भने कि यदि यो वर्षको आईपीएलमा राम्रो सुरुवात भइरहेको छ भने किन सन्यास लिने ?
नासिर हुसेनलाई निशाना बनाउँदै कार्तिकले भने, ‘नासिर तपाई भेडाको लुगामा बाघ हुनुहुन्छ । तपाईले भनेका एक शब्दमा पनि मलाई विश्वास लाग्दैन । नासिर मलाई एक व्यक्ति, खेलाडी, विकेटकिपर वा कुनै पनि हिसाबले मन पराउँदैनन् । यसो भन्दै गरेको यो पहिलो पटक हो । तर पनि यदि तपाईले हुसैनलाई भारतीय टोलीमा कसलाई स्थान दिनुपर्छ भनेर सोध्नुभयो र यदि उहाँले छ विकेटकिपर छनोट गर्नुपर्यो भने उहाँले मलाई आठौं नम्बरमा राख्नेछन् ।’
कार्तिकले थप भने, ‘गत वर्ष विश्वकपमा मलाई बाहिर निकाल्न चाहने एक व्यक्ति नासिर हुसेन थिए । तपाईंले मेरो अन्तर्वार्ता दिनुभयो र मेरो पछाडि छुरा हान्नु भयो ।’
दिनेश कार्तिकले आफ्नो करियरको अन्त्य राम्रो प्रदर्शनका साथ गर्ने आशा राखेका छन् । तर, अहिले आरसीबीको अवस्था नाजुक छ । आरसीबीले आईपीएलमा हालसम्म ५ खेल खेलेको छ, जसमा एउटा मात्रै जित हासिल गरेको छ । फाफ डु प्लेसिसको नेतृत्वमा रहेको आरसीबी टोली अंक तालिकाको नवौं स्थानमा छ ।
