काठमाडौं । बुधबार नेप्से परिसूचक ६.८१ अंकले घटेर २ हजार ४६६.९२ विन्दुमा पुगेको छ ।
बुधबार कारोबारमा आएका २०२ वटा कम्पनीको २ करोड २० लाख ४० हजार ५१६ कित्ता शेयर ९१ हजार ५५९ पटकमा रू. ९ अर्ब ५३ करोड १७ लाख १६ हजार ४९६ बराबरको शेयर खरीदविक्री भएको हो ।
सबैभन्दा बढी स्वाभिमान लघुवित्त वित्तीय संस्थाको शेयर मूल्य १० प्रतिशतले वृद्धि भएको छ । उक्त कम्पनीको शेयर मूल्य प्रतिकित्ता रू. २ हजार ५५२ पुगेको छ । कम्पनीले २० प्रतिशत बोनस शेयर र १.०५ प्रतिशत नगद लाभांश वितरणको लागि साधारण सभा मिती तय गरेसँगै कम्पनीको शेयरमा लगानीकर्ताको आर्कषण बढेको हो ।
कम्पनीले उक्त लाभांश पारित गर्नको लागि आगामी फागुन १३ गते साधारण सभा बोलाएको छ । माघ २९ गतेसम्म कायम शेयरधनीले उक्त लाभांश पाउनेछन् । त्यसैगरी जनउत्थान लघुवित्त वित्तीय संस्थाको शेयर मूल्य पनि ९.९८ प्रतिशतले वृद्धि भएको हो ।
कारोबारमा आएका १२ वटा समूहमध्ये जलविद्युत् समूहको १.०४ प्रतिशत, लघुवित्त समूहको ०.०२ प्रतिशत, बैकिङ्ग समूहको परिसूचक ०.२४ प्रतिशत र म्युचुअल फण्डको ०.३८ प्रतिशतले वृद्धि भएको छ भने बाँकी समूहको परिसुचक घटेको छ ।
बुधबारको कारोबार दिनमा सर्वाधिक कारोबार भने ग्लोबल आइएमई बैंकको भएको छ । उक्त कम्पनीको रू. ५६ करोड १९ लाख बराबरको शेयर खरीदविक्री भएको छ । सर्वाधिक कारोबार गर्ने दोस्रोमा नेपाल पुनर्बीमा कम्पनीको रू. ३२ करोड ७० लाख बराबरको शेयर खरीदविक्री भएको छ ।
बुधबारको कारोबारमा सबैभन्दा बढी पोखरा फाइनान्स कम्पनीको शेयरधनीले गुमाएका छन् । उक्त कम्पनीको शेयर मूल्य ७.८८ प्रतिशतले घटेको हो । उक्त कम्पनीको शेयर मूल्य बुधबार प्रतिकित्ता रू. २६९ कायम भएको छ ।
केहि दिन अघिसम्म कम्पनीको शेयर मूल्य ९ प्रतिशतभन्दा बढीको दरले वृद्धि भएको थियो । बजार केहीमात्रामा करेक्सन भएसँगै लगानीकर्ताले अल्पकालिन नाफा बुक गरेकाले बजार घटेको हो । कारोबारको शुरुवाती समयमा नेप्से २ हजार ५०० अंकमा पुगेको थियो ।
