एजेन्सी । इन्डियन प्रिमियर लिग (आईपीएल)को १७ औं सिजन आजदेखि सुरु हुँदैछ । आज हुने उद्घाटन खेलमा साविक विजेता चेन्नई सुपर किङ्ग्स र रोयल च्यालेन्चजर्स बेंगलूरु भिड्दैछन् ।
यसैबिच रोयल च्यालेन्जर्स बैंगलोरका अनुभवी खेलाडी विराट कोहलीसँग आजको खेलमा विशेष कीर्तिमान बनाउने मौका छ । कोहली टी–२० मा १२ हजार रनको नजिक छन् । यसका लागि उनलाई केवल ६ रनको मात्र आवश्यक रहेको छ ।
यदि उनले यो पूरा गरे १२ हजार टी–२० रन बनाउने पहिलो भारतीय खेलाडी बन्नेछन् । कोहलीले आईपीएल २०२४ को पहिलो खेलमा चेन्नई सुपर किंग्सविरुद्ध यो उपलब्धि हासिल गर्न सक्छन् ।
कोहलीले अहिलेसम्म खेलेका ३७६ टी–२० खेलमा ११९९४ रन बनाएका छन् । उनले यो अवधिमा ८ शतक र ९१ अर्धशतक बनाएका छन् । कोहलीपछि भारतीय खेलाडीको सुचीमा रोहित शर्मा रहेका छन् ।
टी-२० मा सबैभन्दा धेरै रन बनाउने खेलाडीको शीर्ष स्थानमा वेस्ट इन्डिजका क्रिकेटर क्रिस गेल रहेका छन् । गेलले ४६३ खेलमा १४५६२ रन बनाएका छन् । उनले यस फर्म्याटमा २२ शतक र ८८ अर्धशतक बनाएका छन् ।
दोस्रो नम्बरमा शोएब मलिक छन् । उनले ५४२ खेलमा १३३६० रन बनाएका छन् । किरोन पोलार्ड तेस्रो नम्बरमा छन् । उनले ६६० खेलमा १२ हजार ९ सय रन बनाएका छन् । एलेक्स हेल्स चौथो नम्बरमा छन् । उनले १२३१९ रन बनाएका छन् ।
आइपिएलमा विराट कोहलीले अहिलेसम्म खेलेका २३७ खेलमा ७२६३ रन बनाएका छन् । प्रतियोगितामा उनले ७ शतक र ५० अर्धशतक प्रहार गरेका छन् । उनको उत्कृष्ट स्कोर ११३ रन रहेको छ ।
