काठमाडौं । जारी एसीसी वुमन्स प्रिमियर कपमा नेपालले माल्दिभ्ससँग टस जितेको छ । मलेसियाको बाँगीमा भएको टस जितेर नेपालकी कप्तान इन्दु बर्माले पहिला ब्याटिङ रोजेकी छिन् ।
समूह डी मा नेपाल २ खेलमा ४ अंकका साथ शीर्षस्थानमा रहँदै क्वाटरफाइनलमा पुगिसकेको छ । नेपाल अपराजित रहँदै क्वाटरफाइनल खेल्न चाहन्छ । सुरुआती दुवै खेलमा हार बेहोरेको माल्दिभ्स भने प्रतियोगिताबाट बाहिरिसकेको छ ।
नेपालले भुटान र हङकङ दुवैलाई समान ८ विकेटले हराएको थियो । माल्दिभ्स भुटानसँग ९४ रन र हङकङसँग १७२ रनले पराजित भएको थियो ।
१६ टोली सहभागी प्रतियोगितामा चार समूहमा विभाजन गरिएको छ । हरेक समूहका शीर्ष दुई टोली क्वाटरफाइनल खेल्न पाउनेछन् । सेमिफाइनल हुँदै फाइनल पुग्ने दुई टोलीले एसिया कप खेल्न पाउनेछन् ।
