काठमाडौँ । बाँसबारी छालाजुत्ता कारखानाको जग्गा प्रकरणमा पक्राउ परेका व्यवसायी अरुण चौधरीलाई धापासी स्थित ग्राण्डी अस्पतालमा रिफर गरिएको छ ।
केन्द्रीय अनुसन्धान ब्युरोको नियन्त्रणमा रहेका चौधरीलाई ‘स्वास्थ्यमा समस्या’ देखिएको भन्दै बिहिबार राति चिरायु अस्पतालमा भर्ना गरिएको थियो । उनलाई चिरायु अस्पतालले रिफर गरेपछि ग्रान्डीमा सारिएको सिआईबीका एक अफिसरले बताए ।
चौधरीको मुटुमा समस्या देखिएको चिकित्सकहरुले बताएका छन् । सोहि प्रकरणमा पक्राउ परेका बाँसबारी छालाजुत्ता कारखानाका तत्कालीन अध्यक्ष अजितनारायण सिंहलाई पनि ग्राण्डीमा रिफर गरिएको छ । स्वास्थ्यमा खराबी भएपछि उनलाई पनि बिहिबार चिरायु अस्पताल लगिएको थियो ।
उनीहरुले सरकारको नामको १० रोपनी जग्गा किर्ते गरेर निजीकरण गरेको आरोपमा सीआईबीले अनुसन्धान गरिरहेको छ ।
