एजेन्सी । स्पेनिस फुटबल लिग ला लिगा अन्तर्गत रियल मड्रिडले जित निकालेको छ । गएराति भएको खेलमा रियलले २१ खेलमै एक जित पनि निकाल्न नसकेको अल्मेरियालाई ३-२ गोलले पराजित गरेको हो । घरेलु मैदान सान्टियागो बर्नबेउमा दुई गोलले पछि परेको अवस्थामा रियलले कमब्याक गर्दै जित निकालेको हो ।
खेलको पहिलो मिनेटमा नै लार्जी रमाजानीले गोल गर्दै अल्मेरियालाई सुरुवाती अग्रता दिलाएका थिए । ४३ औं मिनेटमा एडगर गोन्जालेजले गोल गर्दै अल्मेरियाको अग्रता दोब्बर पारे ।
दोस्रो हाफमा रियलले तीन गोल गर्यो । खेलको ५७ औं मिनेटमा जुड बेलिंघमले पेनाल्टीमा गोल गर्दै रियललाई खेलमा फर्काए । ६७ औं मिनेटमा भिनिसियस जुनियरले गोल गर्दै रियललाई २-२ गोलको बराबरीमा ल्याए ।
यता, खेल सकिनै लाग्दा ड्यानी कार्भाहालले गोल गर्दै रियललाई महत्वपूर्ण जित दिलाए । जितसँगै २० खेलबाट ५१ अंक जोडेको रियल तालिकाको दोस्रो स्थानमा छ । अल्मेरिया २१ खेलबाट ६ अंकका साथ पुछारमा छ ।
