काठमाडौँ । नेकपा एमालेका अध्यक्ष केपी शर्मा ओलीले आगामी जेठ ४ गते स्थानीय निकायको निर्वाचन हुनै पर्ने बताउनुभएको छ । बुधबार बसेको पार्टी केन्द्रीय सचिवालयलाई उहाँले सरकारलाई निर्वाचन आयोगले सिफारिस गरेको मितिमा स्थानीय निकायको निर्वाचन हुनुपर्ने बताउनुभयो । निर्वाचन आयोगले सरकारसमक्ष आगामी जेठ ४ गते स्थानीय निकायको निर्वाचन सम्पन्न गर्न सिफारिस गरेको छ ।
उहाँले निर्वाचन सरकारको स्वेच्छाको विषय नभएकाले निर्वाचन आयोगले दिएको मितिमा निर्वाचन गर्नुपर्ने बाध्यता सरकारलाई रहेको बताउनुभयो । उहाँले संविधानअनुसार फागुनभित्रै स्थानीय निकायको निर्वाचन गराउनुपर्ने थियो भन्दै सो सम्बन्धमा एमालेले पटकपटक ध्यानाकर्षण गराएको बताउनुभयो । सरकार संविधान कार्यन्वयन, लोकतान्त्रिक अभ्यास र सङ्घीयताको कार्यन्वयन गर्न नलागेर सत्ता स्वार्थमा केन्द्रीत हुँदा निर्वाचन पर सर्ने स्थिति आएको उहाँको भनाइ थियो ।
