नयाँ दिल्ली । विश्व स्वास्थ्य सङ्गठन (डब्लुएचओ) ले कोभिड–१९ सम्बन्धी पब्लिक हेल्थ एड्भाइजरी करिब ७ महिनाअघि फिर्ता लिएको थियो तर भाइरस भने हटेको छैन । ओमिक्रोन भेरिएन्ट धेरै नयाँ सब भेरिएन्टमा परिणत भएको छ । पछिल्लो भेरिएन्ट जेएन.१ हो । यसले तीव्ररुपमा कोरोना केसहरू बढाएको छ ।

भारतमा कोभिड–१९ बाट बिहीबार केरलामा तीन, कर्नाटकमा दुई र पञ्जाबमा एक गरी छ जनाको मृत्यु भएको छ । भारतमा कोभिडका ५९४ नयाँ केस फेला परेको छ । मेपछि यो पछिल्लो सात महिनाको उच्च संख्या हो । स्वास्थ्य मन्त्रालयका एक अधिकारीले कोभिड– १९ ले गम्भीर लक्षण वा मृत्यु ननिम्त्याउने बताएका छन् । परीक्षणमा पोजिटिभ देखिएका अधिकांशमा हल्का लक्षण मात्र देखिएका छन् ।

भारत सरकारले अहिलेसम्म कुनै ट्राभल एड्भाइजरी जारी गरेको छैन । साथै विमानस्थलहमा आरटी वा पिसिआर परीषण अनिवार्य गर्ने योजनासमेत बनाएको छैन । भारतलगायत धेरै देशमा कोरोनाका केस बढ्दै गएपछि विज्ञहरूले यसलाई नयाँ लहर भन्नुअघि अझै केही दिन कुर्नुपर्ने बताएका छन् । विज्ञहरुका अनुसार आत्तिनुपर्ने अवस्था छैन । डब्ल्यूएचओका पूर्व प्रमुख वैज्ञानिक डा सौम्या स्वामीनाथनले इन्फ्लुएन्जा ए (एच१एन१ र एच३एन२), एडेनोभाइरस, राइनोभाइरस र रेस्पिरेटरी सिन्सिटियल भाइरसका कारणले हुने श्वासप्रश्वासको संक्रमणले वर्षायाममा रोग निम्त्याउन सक्ने भन्दै यसको लक्षण कोभिड–१९ सँग मिल्दोजुल्दो रहेको जानकारी दिनुभयो ।

उहाँले भन्नुभयो, “रुघा र ज्वरो आएका सबैको परीक्षण गर्न सकिँदैन । श्वासप्रश्वाससम्बन्धी गम्भीर रोग वा निमोनियाका कारण अस्पतालमा भर्ना भएका व्यक्तिहरूको मात्रै परीक्षण गर्नुपर्छ।” थोरै मानिसको परीक्षण गर्दा कोरोना संक्रमित बढ्दै गएको छ कि छैन थाहा पाउन गाह्रो हुन्छ । तर, केसहरू बढ्दै छ वा छैन भन्नेबारे भविष्यवाणी गर्ने तरिका छ। त्यो विधि हो–फोहोर पानी परीक्षण। ग्लेनेगल्स ग्लोबल हेल्थ सिटीका संक्रामक रोग विशेषज्ञ डा सुब्रमण्यम स्वामीनाथनका अनुसार धेरै देशमा फोहोर पानीको नमूना परीक्षण गरी कस्तो प्रकारको संक्रमण फैलिरहेको छ वा छैन भनी पत्ता लगाइन्छ। कोरोना खोपहरू गम्भीर रोगहरूबाट जोगाउन प्रभावकारी साबित भएका छन्, तर शरीरमा तिनीहरूको प्रभाव समयसँगै कम हुँदै जान्छ।

धेरैजसो मानिसलाई कोरोना लागेको छ वा कम्तिमा दुईवटा खोप लगाएका छ भने पनि फेरि संक्रमित भइरहेका छन्। यसैले डब्लुएचओले जेएन.१ भेरिएन्टलाई ‘भेरिएन्ट अफ कन्सर्न’ घोषणा गरेको छ । यो द्रुत रूपमा फैलिन्छ। भारत लगायत धेरै देशहरूमा खोपको अद्यावधिक संस्करण पहिले नै उपलब्ध छ। एपोलो अस्पतालका सरुवा रोग विशेषज्ञ डा रामसुब्रमण्यमका अनुसार वृद्ध, कमजोर रोग प्रतिरोधी क्षमता भएका र कुनै गम्भीर रोग भएकाले बुस्टर डोज लिन आवश्यक छ।